İran parlamentinin milli təhlükəsizlik və xarici siyasət komitəsinin sözçüsü İbrahim Rezai ölkəyə qarşı yeni hücum olacağı təqdirdə Tehranın uranı 90 faizə qədər zənginləşdirə biləcəyini bildirib.
"Operativ Məlumat Mərkəzi-OMM" xəbər verir ki, iranlı deputat bu barədə X sosial şəbəkəsində paylaşım edib.
“Başqa bir hücum halında İranın seçimlərindən biri uranın 90 faiz zənginləşdirilməsi ola bilər. Biz bunu parlamentdə nəzərdən keçirəcəyik”, - deyə Rezai qeyd edib.
İran rəsmisinin açıqlaması bölgədə gərginliyin artdığı və Tehran ətrafında təhlükəsizlik narahatlıqlarının davam etdiyi bir vaxtda səsləndirilib.
Qərb ölkələri uzun müddətdir ki, İranın nüvə proqramının mümkün hərbi məqsədlərlə istifadə oluna biləcəyindən narahatlıq ifadə edir. Tehran isə nüvə fəaliyyətinin yalnız dinc məqsədlər daşıdığını bildirir.
