Afət Ziyadqızı
ABŞ və İran arasında əldə olunan çərçivə sazişindən sonra İran tankerləri iki aydan sonra ilk dəfə xam neft ixrac etməyə başlayıb.
“Operativ Məlumat Mərkəzi-OMM” xəbər verir ki, bu barədə CNN məlumat yayıb.
Məlumata görə, Vaşinqton və Tehran arasında ABŞ-nin İran limanlarına tətbiq etdiyi blokadanın aradan qaldırılmasını nəzərdə tutan razılaşmanın elan edilməsindən sonra İran neft daşımalarını bərpa edib.
Gəmiçilik analitik şirkəti "TankerTrackers"in məlumatına əsasən, İran tankerləri artıq iki neft yükünü uğurla ixrac edib.
Şirkətin açıqlamasında bildirilib ki, hər biri təxminən 3,8 milyon barel xam neft daşıyan ən azı iki İran Milli Tanker Şirkətinə məxsus supertanker ABŞ-nin dəniz blokadasını keçib. Hadisə peyk görüntüləri ilə də təsdiqlənib.
Qeyd olunur ki, ABŞ Prezidenti Donald Tramp razılaşdırılmış memorandumun şərtlərinə uyğun olaraq iyunun 15-də Hörmüz boğazının açılacağını açıqlamışdı. Lakin daha sonra vaxt cədvəli yenidən nəzərdən keçirilib və Tramp sənədin İsveçrədə rəsmi imzalanmasından sonra boğazın iyunun 19-da açılacağını bildirib.
