İran müharibəsi Somalidə aclıq böhranını kəskinləşdirir

İranla bağlı gərginliklərin yaratdığı gəmiçilik problemlərinin Somaliyə humanitar yardımın çatdırılmasına ciddi təsir göstərdiyi bildirilir.

"Operativ Məlumat Mərkəzi-OMM" xəbər verir ki, “Reuters” agentliyinin məlumatına görə, İran müharibəsi ilə əlaqəli dəniz nəqliyyatında yaranan fasilələr Somaliyə həyati əhəmiyyətli ərzaq yardımlarının çatdırılmasını gecikdirir və ölkədə davam edən aclıq böhranını daha da dərinləşdirir.

Yardım təşkilatlarına istinadən qeyd olunur ki, çatdırılma müddətinin uzanması və logistika xərclərinin artması nəticəsində ağır qidalanma çatışmazlığının müalicəsində istifadə edilən terapevtik qida ehtiyatları azalıb. Bu da bəzi klinikaların uşaqları qəbul etməməsinə və ya geri qaytarmağa məcbur qalmasına səbəb olub.

Məlumata əsasən, Somalidə beş yaşdan kiçik təxminən 500 min uşaq kəskin qidalanma çatışmazlığından əziyyət çəkir. Quraqlıq və humanitar resursların azalması fonunda vəziyyətin daha da ağırlaşdığı bildirilir.

Qeyd olunur ki, əvvəllər təxminən bir ay çəkən yardım daşımaları hazırda Fars körfəzi marşrutlarındakı məhdudiyyətlər səbəbindən iki aya qədər uzanıb. Bu isə həm xərclərin artmasına, həm də müalicə oluna bilən uşaqların sayının azalmasına gətirib çıxarır.

Yardım agentlikləri münaqişə, maliyyə çatışmazlığı və logistika gecikmələrinin birləşməsinin daha çox uşağın həyatını təhlükə altına sala biləcəyi barədə xəbərdarlıq ediblər.