OMM Redaksiyası
İran Əfqanıstanın ticarət imkanlarını genişləndirməsinə kömək məqsədilə liman infrastrukturunu icarəyə verməyi nəzərdən keçirir. İran Xarici İşlər Nazirliyinin sözçüsü İsmayıl Bəqai bu təklifin İran və Əfqanıstan rəsmilərinin rəsmi görüşləri çərçivəsində irəli sürüldüyünü deyib.
“ISNA” agentliyinin məlumatına görə, Bəqai bazar ertəsi keçirilən mətbuat konfransında mümkün icarənin “yaxşı qonşuluq” prinsipi əsasında təklif oluna biləcəyini bildirib.
“Bu addım, əslində, ticarət əməkdaşlığının inkişafı və qonşuluq münasibətlərinin möhkəmləndirilməsi istiqamətində müsbət təşəbbüslərdən biridir”, – deyə Bəqai əlavə edib.
Onun sözlərinə görə, dənizə çıxışı olmayan ölkələrə liman imkanlarının icarəyə verilməsi beynəlxalq praktikada geniş yayılıb.
İran mediasının məlumatına əsasən, iki ölkə arasındakı danışıqlarda sənaye sahəsində əməkdaşlıq və ikitərəfli ticarət məsələləri də müzakirə olunub.
Əfqanıstan Ticarət və Sənaye Nazirliyinin sözçüsü ötən il “Pajhwok” agentliyinə bildirib ki, İranla Əfqanıstan arasında ticarət dövriyyəsi 2025-ci ildə təxminən 3,37 milyard dollara çatıb.
Əfqanıstan Pakistanla sərhəddəki gərginlik fonunda İran üzərindən keçən ticarət marşrutlarından istifadəsini artırıb. Tehran Taliban administrasiyasını rəsmi olaraq tanımır, lakin İran hakimiyyəti Kabil ilə diplomatik, iqtisadi və təhlükəsizlik əlaqələrini davam etdirir.
