OMM Redaksiyası
İran Prezidenti Məsud Pezeşkian sentyabrın 22-də BMT Baş Assambleyasının 81-ci sessiyasında iştirak etmək üçün Tehrandan Nyu-Yorka yola düşüb. Xarici işlər naziri Abbas Əraqçi isə diplomatik nümayəndə heyətinin rəhbəri kimi bundan əvvəl ABŞ-a gedib.
İran rəsmiləri illik toplantı çərçivəsində qlobal və regional məsələlər üzrə Tehranın mövqeyini açıqlayacaqlarını və ölkənin milli maraqlarını müdafiə edəcəklərini bildiriblər.
Tehran BMT tribunasından istifadə edəcək
Pezeşkian yola düşməzdən əvvəl jurnalistlərə açıqlamasında BMT Baş Assambleyasında iştirakın İranın mövqeyini izah etmək, regiondakı reallıqları çatdırmaq və İran xalqının səsini dünya ictimaiyyətinə duyurmaq üçün imkan yaratdığını deyib.
İran Prezidenti ölkə mediası nümayəndələrinə ABŞ tərəfindən viza verilməməsinə də münasibət bildirib. Onun sözlərinə görə, BMT tribunası İranın mesajını çatdırmaq üçün kifayətdir və Nyu-Yorkda çoxsaylı media qurumları fəaliyyət göstərir.
Pezeşkian əlavə edib ki, tətbiq olunan məhdudiyyətlər bəzi tərəflərin regiondakı hadisələrin gerçəklərinin səsləndirilməsindən narahat olduğunu göstərə bilər.
İran ABŞ-ı dezinformasiya kampaniyasında ittiham edir
İran Xarici İşlər Nazirliyinin sözçüsü İsmayıl Bəqayi ABŞ administrasiyasının Pezeşkianın media komandasının üzvlərinə viza verməməsini həqiqəti gizlətmək və dezinformasiya kampaniyasını irəlilətmək cəhdi kimi qiymətləndirib.
Bəqayi “X” platformasındakı paylaşımında Vaşinqtonun ölkə daxilində bəyənmədiyi jurnalistlərin, eləcə də susdurmaq istədiyi xarici müxbirlərin, o cümlədən İran Prezidentinin kommunikasiya komandasının üzünə qapıları bağladığını yazıb.
O, bu vəziyyəti “Bir vaxtlar Dəmir pərdəni dağıtmaqla fəxr edən bir xalq indi öz pərdələrindən birinin arxasında dayanıb” ifadəsi ilə şərh edib.
Diplomatik görüşlər və daxili təzyiq
Nyu-Yorka çatan Əraqçi BMT-nin baş katibi Antonio Quterreşlə telefonla danışıb. İran Xarici İşlər Nazirliyinin məlumatına görə, tərəflər Baş Assambleyanın gündəliyindəki məsələləri və beynəlxalq sülh və təhlükəsizliyin möhkəmləndirilməsi istiqamətində baş katibin səylərini müzakirə ediblər.
İran mediasının nazirliyin məlumatlarına istinadən yaydığı xəbərə əsasən, Əraqçi Avropa İttifaqının xarici siyasət rəhbəri Kaya Kallas, həmçinin Qətər, İsveçrə və İtaliyanın xarici işlər nazirləri, eləcə də Norveç xarici işlər nazirinin müavini ilə görüşüb.
Pezeşkianın BMT tədbiri çərçivəsində həmkarları ilə görüşləri planlaşdırılır. Bununla belə, İranda bəzi dairələr onu ABŞ rəsmiləri ilə dayanmış atəşkəs danışıqları üzrə görüşməməyə çağırır. Həmin qüvvələr ABŞ-la sülh danışıqlarını istisna edir və İranın keçmiş ali rəhbərinin və hərbi komandirlərinin öldürülməsinə görə qisas tələb edirlər.
Bu mövqelər İranda 1980-1988-ci illər İran-İraq müharibəsinin ildönümünə həsr olunan “Müqəddəs Müdafiə Həftəsi” tədbirləri və hərbi paradlar keçirilən vaxt daha da güclənib.
