İran Xarici İşlər Nazirliyinin sözçüsü İsmayıl Beqayi həftəlik mətbuat konfransında ölkədə 800 nəfərin edam ediləcəyi barədə yayılan məlumatları qəti şəkildə təkzib edib.
"Operativ Məlumat Mərkəzi-OMM" xarici KİV-ə istinadən xəbər verir ki, o, bu cür iddiaların məsuliyyətsiz və əsassız olduğunu bildirib.
"Məhkəmə qərarlarının qəbul edilməsi müəyyən vaxt tələb edir. Belə mühüm məsələ barədə bu qədər qısa müddətdə qərar verilə bilməz" - deyə sözçü qeyd edib.
Beqayi həmçinin bəzi səfirliklərin bağlanması ilə bağlı suallara da aydınlıq gətirib.
O bildirib ki, internetin kəsilməsi və baş verən hadisələrdən yaranan narahatlıq səbəbindən bəzi diplomatlar ölkələrinə qayıtsalar da, heç bir səfirlik fəaliyyətini dayandırmayıb.
Tehran rəhbərliyi müvəqqəti gedən diplomatların tezliklə geri dönəcəyinə və iş rejiminin normallaşacağına ümid etdiyini vurğulayıb.
Xatırladaq ki, ABŞ Prezidenti Donald Tramp yanvarın 16-da sosial media hesabında İran rəhbərliyinin 800-dən çox edam qərarını ləğv etməsini alqışladığını bildirmişdi.
