OMM Redaksiyası
“Qalatasaray”ın təcrübəli futbolçusu İlkay Gündoğan 2025 Mevlüde Genç medalına layiq görülüb.
Mükafat Şimali Reyn-Vestfaliya hökuməti tərəfindən irqçilik, nifrət və ayrı-seçkiliyə qarşı mövqeyi ilə gənclərə nümunə olan şəxslərə və icmalara təqdim edilir. Medal 1993-cü ildə Solingen şəhərində neonasistlərin törətdiyi yanğın nəticəsində iki qızı, iki nəvəsi və bir qardaşı qızını itirən fəal Mevlüde Gençin xatirəsinə təsis olunub.
Mərasim Almaniyanın İstanbulun Tarabya rayonunda yerləşən səfirlik iqamətgahında keçirilib. Tədbirdə Şimali Reyn-Vestfaliya əyalətinin baş naziri Hendrik Vüst, Almaniyanın Türkiyədəki səfiri Sibylle Katharina Sorg, “Qalatasaray”ın baş məşqçisi Okan Buruk, klubun futbolçuları Leroy Sane, Kaan Ayhan, Eyüp Aydın və Can Armando Güner iştirak ediblər.
İlkay Gündoğan mükafatlandırmadan sonra bunun onun üçün böyük şərəf olduğunu bildirib. O, futbolçu olmaqla yanaşı, davranışı və mövqeyi ilə insanlara nümunə olmağın məsuliyyətini daşıdığını vurğulayıb.
Hendrik Vüst isə Gündoğanın Almaniya millisində kapitanlıq etdiyini xatırladaraq onun irqçilik və ayrı-seçkiliyə qarşı mübarizədə, həmçinin Almaniya ilə Türkiyə arasında əlaqələrin möhkəmləndirilməsində mühüm rol oynadığını deyib.
