İlham Əliyev: U-15 və U-20 dünya çempionatlarına hazırlıq yüksək səviyyədədir

Azərbaycanda 15 yaşadək və 20 yaşadək futbolçular arasında keçiriləcək dünya çempionatlarına hazırlıq işləri yüksək səviyyədə aparılır.

Prezident İlham Əliyev bunu sentyabrın 29-da FIFA-nın prezidenti Canni İnfantinonu qəbul edərkən bildirib.

Dövlət başçısı gələn ay Azərbaycanda ilk dəfə təşkil olunacaq 15 yaşadək oğlan futbolçular arasında FIFA U-15 dünya çempionatı və festivalına hazırlığın davam etdiyini deyib.

İlham Əliyev, həmçinin 2027-ci ildə keçiriləcək 20 yaşadək kişi futbolçular arasında FIFA U-20 Dünya Kubokuna hazırlıq işlərinin də yüksək səviyyədə aparıldığını vurğulayıb.

Prezident Azərbaycanın bu idman tədbirlərində iştirakının əhəmiyyətini qeyd edib. O, çempionatların ümumilikdə regionda futbolun inkişafına töhfə verəcəyinə ümidvar olduğunu bildirib.