OMM Redaksiyası
Azərbaycan Prezidenti İlham Əliyev Bakıda, Heydər Əliyev Mərkəzində keçirilən Yeni Azərbaycan Partiyasının VIII qurultayında çıxış edərək ölkənin daxili işlərinə kənardan müdaxiləyə qarşı xəbərdarlıq edib.
Əliyev bildirib ki, Azərbaycana qarşı hər zərbəyə bir neçəqat cavab verilə bilər. “Bir zərbəyə iki, beş, hətta on zərbə ilə cavab verə bilərik ki, hər kəs öz yerini bilsin, işimizə qarışmasın, həyat tərzimizə müdaxilə etməsin və bizə nə etməli olduğumuzu deməsin”, – deyə prezident qeyd edib. O, ölkənin kənar himayəyə ehtiyacı olmadığını vurğulayıb.
Minsk qrupu və 2020-ci il müharibəsi
Prezident 2020-ci ildəki 44 günlük müharibə zamanı ATƏT-in keçmiş Minsk qrupunun həmsədrlərinin mövqeyini də tənqid edib. Onun sözlərinə görə, həmsədr ölkələr müharibə zamanı Azərbaycanın əleyhinə olub və Ermənistanı dəstəkləyiblər.
Əliyev Minsk qrupunun əsas məqsədinin keçmiş münaqişəni həll etmək deyil, “dondurmaq” olduğunu deyib. 1992-ci ildə münaqişənin danışıqlar yolu ilə həlli üçün yaradılmış qrupa Fransa, Rusiya və ABŞ həmsədrlik edib. Qrup 2025-ci ilin sentyabrında Azərbaycan və Ermənistanın müraciəti əsasında ləğv olunub.
Özünütəminetmə və müstəqil inkişaf
Əliyev Azərbaycanın öz gücünə arxalanmasının vacibliyini vurğulayıb. O, 1990-cı illərdə Birinci Qarabağ müharibəsindən sonra ölkədə bir milyon qaçqın və məcburi köçkünün olduğu dövrdə Azərbaycanın tək qaldığını bildirib.
“Bu, humanitar fəlakət idi və biz tamamilə tək qalmışdıq. Müharibə zamanı da, müharibədən sonra da bizə kömək edən olmadı”, – prezident deyib. Onun sözlərinə görə, Azərbaycan çətinlikləri öz gücü ilə geridə qoyub, ölkənin uğurlarında xalqın iradəsi, Ulu Öndərə inam və onun siyasi kursu rol oynayıb.
