OMM Redaksiyası
ABŞ cümə günü təhlükəsizliklə bağlı açıqlanmayan narahatlıqlara görə Braziliyadakı səfirlik və konsulluqlarında konsulluq xidmətlərini dayandırıb. Bundan sonra Avstraliya prezident seçkisinə iki gün qalmış Braziliyanın paytaxtı Braziliadakı səfirliyini bağlayıb.
ABŞ Dövlət Departamenti təhlükəsizlik narahatlıqlarının nədən qaynaqlandığını açıqlamayıb və onları bazar günü keçiriləcək səsvermə ilə birbaşa əlaqələndirməyib. Qurum Braziliya hakimiyyəti ilə işlədiyini bildirib, lakin konsulluq xidmətlərinin nə vaxt bərpa olunacağına dair məlumat verməyib.
Polis təhlükə iddialarını araşdırır
Cümə günü Braziliya Federal Polisi ABŞ-ın diplomatik nümayəndəliklərinə qarşı təhdid iddiaları ilə bağlı araşdırma çərçivəsində San-Pauluda və Braziliya yaxınlığında axtarışlar aparıb.
Polisin məlumatına görə, indiyədək təhdidə dair konkret sübut aşkarlanmayıb və cinayətkar təşkilatlarla əlaqəli şübhəlilər müəyyən edilməyib.
Avstraliyanın Braziliyadakı səfiri Sofi Devis ABŞ-ın xəbərdarlığına istinad edərək, təhlükəsizlik narahatlıqları səbəbindən Braziliyadakı Avstraliya səfirliyinin də cümə günü bağlandığını bildirib. O, avstraliyalılara Braziliyadakı ABŞ diplomatik nümayəndəliklərindən uzaq durmağı tövsiyə edib. Braziliya Xarici İşlər Nazirliyi şərh verməkdən imtina edib.
Seçki ərəfəsində gərginlik
ABŞ-ın açıqlaması Braziliyada bazar günü keçiriləcək prezident seçkisi ərəfəsinə təsadüf edib. Prezident Luiz İnasio Lula da Silva növbəti müddətə seçilmək üçün keçmiş prezident Jair Bolsonaroğlu senator Flavio Bolsonaro ilə mübarizə aparır.
Heç bir namizəd etibarlı səslərin 50 faizindən çoxunu toplamazsa, ikinci tur oktyabrın 25-nə təyin edilib.
Reuters yazır ki, seçki kampaniyası dövründə Vaşinqtonla Braziliya arasında münasibətlər gərginləşib. Lula və onun müttəfiqləri ABŞ Prezidenti Donald Tramp administrasiyasını ABŞ tariflərini və seçkilərin dürüstlüyü ilə bağlı müzakirələri nümunə göstərərək Braziliya siyasətinə təsir etməyə çalışmaqda ittiham ediblər.
Ağ Ev seçkilərə müdaxilə iddialarını rədd edib. Reuters-in məlumatına görə, Tramp Flavio Bolsonaroya açıq dəstəyini ifadə etsə də, namizədlərdən heç birini rəsmi şəkildə dəstəkləməyib.
Lulanın Fəhlə Partiyasının sədri Edinyo Silva diplomatik nümayəndəliklərin bağlanmasını presedenti olmayan addım adlandırıb və Trampı Braziliya ictimai rəyinə təsir göstərməyə çalışmaqda ittiham edib.
Reuters-in məlumatına görə, Braziliya kəşfiyyat rəsmiləri Avropadakı həmkarlarına seçkiyə ABŞ və Rusiyanın müdaxiləsi kimi xarakterizə etdikləri məsələlər barədə məlumat veriblər. Vaşinqton və Moskva bu iddiaları rədd edib.
Nümayəndəliklərin bağlanması seçki kampaniyası zamanı təhlükəsizliklə bağlı narahatlıqları artırıb. Reuters qeyd edir ki, zorakı cinayətkarlıq seçiciləri narahat edən əsas məsələlərdəndir.
