OMM Redaksiyası
İngiltərənin "Mançester Siti" klubunun və Norveç yığmasının ulduz futbolçusu Erling Haalandın komandanı tərk etmək ehtimalı gündəmə gəlib.
"Operativ Məlumat Mərkəzi-OMM" İspaniya mediasına istinadən xəbər verir ki, skandinaviyalı bombardir baş məşqçi Xosep Qvardiolanın postunu tərk etməsindən sonra klubdakı gələcəyi ilə bağlı ciddi şübhələr yaşayır.
Məlumata əsasən, 25 yaşlı hücumçu komandanın yeni rəhbərlik altında, xüsusilə Enso Mareskanın rəhbərliyi ilə həyata keçirəcəyi layihənin effektivliyini müşahidə edəcək.
Yalnız bundan sonra futbolçu karyerası ilə bağlı yekun qərarını verəcək. Hazırda Haalandın potensial transferi üçün adı hallanan klublar arasında İspaniyanın nəhəngləri - "Real Madrid" və "Barselona" ön plandadır.
Xatırladaq ki, Erling Haaland 2022-ci ilin yayından etibarən "Mançester Siti"nin şərəfini qoruyur. Onun klubla olan hazırkı müqaviləsi 2034-cü ilin iyun ayına qədər nəzərdə tutulub. Transfer bazarında dəyəri 200 milyon avro olaraq qiymətləndirilən ulduz oyunçunun gələcək addımları futbol ictimaiyyətində böyük maraqla gözlənilir.
