Gürcüstan prezidenti Salome Zurabişvili ölkədə keçirilən parlament seçkilərində yol verilmiş qanun pozuntuları ilə bağlı Konstitusiya Məhkəməsinə müraciət edib.
"Operativ Məlumat Mərkəzi-OMM" xəbər verir ki, bu barədə dövlət başçısının vəkili Eka Beseliya bildirib.
Onun sözlərinə görə, Zurabişvilinin işi oktyabrın 26-da keçirilmiş parlament seçkilərində səsvermə sirrinin və ümumi seçki hüququnun pozulması ilə bağlı şikayətdən ibarətdir.
Oktyabrın 26-da Gürcüstanın ali qanunverici orqanına seçkilər keçirilib. Nəticədə hakim “Gürcü arzusu” partiyası 54,3% səslə qalib gəlib. Lakin bəzi müxalifət siyasi birlikləri seçkinin nəticələrini qəbul etməyib.
