Gürcüstan parlamentinin Regional siyasət və özünüidarəetmə komitəsi Tsiv-Qombori Milli Parkının yaradılmasını nəzərdə tutan qanun layihəsinə ilkin dəstəyini verib. Layihəni parlamentə təqdim edən Gürcüstanın ətraf mühitin mühafizəsi və kənd təsərrüfatı nazirinin müavini Zurab Ezuqbaia sənədin təfərrüatları barədə məlumat verib.
Qanun layihəsinə əsasən, Azərbaycanla sərhədə yaxın Kaxeti bölgəsində, xüsusilə Saqareco, Qurcaani və Telavi bələdiyyələrinin ərazisində 21 min 761 hektarlıq sahədə yeni milli parkın qurulması planlaşdırılır. Təşəbbüs çərçivəsində aşağıdakı tədbirlərin həyata keçirilməsi nəzərdə tutulur:
- Tsiv-Qombori Milli Parkının yaradılması;
- Siqnaqi Təbiət Qoruğunun təsis edilməsi;
- Tsiv-Qombori Qoruq Landşaftının yaradılması.
Rəsmi açıqlamaya görə, layihənin əsas məqsədi regionda biomüxtəlifliyin qorunması, meşə ekosistemlərinin mühafizəsi və ekoturizm potensialının artırılmasıdır. İdarəetmə məsələlərinə gəldikdə, Tsiv-Qombori Milli Parkı və Siqnaqi Təbiət Qoruğu Gürcüstanın Qorunan Ərazilər Agentliyinin tabeliyində olacaq, Tsiv-Qombori qorunan landşaft zonasının idarəçiliyi isə Qurcaani bələdiyyəsinə veriləcək. Qanun layihəsi artıq parlamentin plenar iclasına tövsiyə edilib.
