Afət Ziyadqızı
Fransada müşahidə olunan ekstremal isti hava dalğası ölkədə ölüm hallarının artmasına səbəb olub.
“Operativ Məlumat Mərkəzi-OMM” xəbər verir ki, Fransa Səhiyyə naziri Stephanie Rist mətbuata açıqlamasında iyunun 22-dən 28-dək olan dövrdə ölkədə qeydə alınan ölüm sayının əvvəlki illərin orta göstəricisi ilə müqayisədə 2 min 25 nəfər çox olduğunu bildirib.
Məlumata görə, nazirlik tərəfindən təqdim edilən statistikada iyunun 22-si ilə başlayan həftə ərzində ölüm hallarının əvvəlki həftə ilə müqayisədə 30 faiz artdığı qeyd olunub. Daha əvvəl Səhiyyə Nazirliyi iyunun 24–28-i aralığında isti hava dalğası ilə bağlı təxminən 1000 nəfərin həyatını itirdiyini açıqlamışdı.
Bildirilir ki, iyun ayı ərzində təxminən iki həftə davam edən anomal istilər ölkənin nəqliyyat, təhsil, səhiyyə və sənaye sektorlarında ciddi çətinliklər yaradıb. Xüsusilə Parisdə vəziyyət daha ağır olub və iyunun 26-da paytaxtda 109 nəfərin istilərlə əlaqədar vəfat etdiyi bildirilir.
Qeyd olunur ki, meteoroloqlar gələn həftədən etibarən Fransada yeni isti hava dalğasının başlayacağını proqnozlaşdırır və bu səbəbdən rəsmilər əhalini ehtiyat tədbirlərini gücləndirməyə çağırır.
