OMM Redaksiyası
Fransada prokurorluq ağıllı eynəklərdən istifadə ilə bağlı ehtimal olunan cinsi təqib hallarını araşdırmağa başlayıb. Paris prokurorluğunun məlumatına görə, küçədə qadınların gizli şəkildə lentə alınması və görüntülərin onların razılığı olmadan sosial şəbəkələrdə paylaşılması ilə bağlı şikayətlər daxil olub.
İstintaq sosial mediada yayılan və kişilərin ağıllı eynəklərlə qadınları xəbərsiz çəkərək görüntüləri internetdə paylaşdığı trenddən sonra başlanıb. Prokurorluq konkret brendin adını açıqlamayıb. Bununla belə, kibercinayətkarlıq bölməsinin iki həftə əvvəl bu cihazların hansı hüquq pozuntularına imkan verə biləcəyini anlamaq üçün onları sınaqdan keçirdiyi bildirilib.
Bazarda təxminən 76 faiz paya sahib olan “Meta” şirkətinin “EssilorLuxottica” ilə birgə hazırladığı süni intellektlə işləyən eynəklər ötən il 7 milyon ədəd satılıb. “Meta”nın nümayəndəsi məxfilik prinsiplərinin cihazların hazırlanmasının ilk mərhələsindən etibarən nəzərə alındığını və eynəklərin imkanları artdıqca qoruyucu tədbirlərin də gücləndiriləcəyini deyib. “EssilorLuxottica” isə məsələyə münasibət bildirməyib.
Ağıllı eynəklər digər ölkələrdə də tənzimləyici qurumların diqqətini cəlb edir. Böyük Britaniyada bəzi kinoteatrlar bu cihazların istifadəsini qadağan edib. Almaniyada istehlakçı qrupu “Meta” və digər istehsalçılarla bağlı cinayət şikayəti verib. Avstraliya isə kameralı ağıllı eynəklərin dövlət müəssisələrində istifadəsini qadağan etməyi nəzərdən keçirir.
Fransanın Məlumatların Mühafizəsi üzrə Milli Komissiyası (“CNIL”) ağıllı eynəklərin iş yerlərində istifadəsi ilə bağlı 10-dan az şikayət aldığını açıqlayıb. Qurum eyni zamanda işəgötürənlərin bu cihazları qadağan edib-edə bilməyəcəkləri barədə daha çox müraciət etdiyini bildirib.
“CNIL” nümayəndəsi Nasera Bekhat insanların lentə alındıqları barədə məlumatlandırılması və razılıqlarının alınması məsələsində ağıllı eynəklərin ciddi problemlər yaratdığını deyib. Cihazda çəkilişin aparıldığını göstərən kiçik işıq olsa da, hüquq müdafiəçiləri bunun məsuliyyəti potensial qurbanların üzərinə qoyduğunu bildirirlər.
İnternet təhlükəsizliyi üzrə “e-Enfance” qrupunun nümayəndəsi İnes Leqandr vurğulayıb ki, işığın yanması görüntünün minlərlə insanla paylaşılmasına razılıq verildiyi anlamına gəlmir. Qadın hüquqları təşkilatları isə qadınların bu cür çəkilişlərin hədəfinə daha çox çevrildiyini və texnologiya şirkətlərinin əlavə tədbirlər görməli olduğunu qeyd edirlər.
