Beynəlxalq Avtomobil Federasiyası (FIA) Formula-1 yarışlarına xidmət edəcək vahid daimi stüardlar heyətinin yaradılacağını açıqlayıb.
Mütəxəssislər qrupunun formalaşdırılmasına 2027-ci ildə başlanacaq. Stüardlar sərbəst yürüşlər, sıralanma turları və yarışlar zamanı baş verən müxtəlif insidentlərlə bağlı qərarlar verəcəklər.
Stüardlar departamentinin 12-15 nəfərdən ibarət olması nəzərdə tutulur. Heyət yarışlara xidmət təcrübəsi olan və avtoidmanda müstəqil çıxış etmiş ştatdankənar mütəxəssislərlə də məsləhətləşmələri davam etdirəcək.
FIA rəhbərliyi daimi heyətin yaradılmasının Qran-prinin bir mərhələsindən digərinə qərarların daha ardıcıl olmasına kömək edəcəyini düşünür.