OMM Redaksiyası
“Fənərbağça”nın yeni baş məşqçisinin portuqaliyalı mütəxəssis Serjio Konseysao olacağı iddia edilir. İstanbul klubu ilə 51 yaşlı çalışdırıcı arasında 1,5 illik müqavilə barədə razılıq əldə olunduğu bildirilir.
"Operativ Məlumat Mərkəzi-OMM" xəbər verir ki, bu barədə Türkiyə mediası məlumat yayıb.
Bildirilir ki, tərəflər arasında müqavilənin müddəti ilə bağlı fikir ayrılığı aradan qaldırılıb. Əvvəlcə klub 1,5 illik müqavilə təklif edib, Konseysao isə 2,5 illik anlaşma istəyib. Son danışıqlardan sonra tərəflərin 1,5 illik müqavilə üzərində razılaşdığı iddia olunur.
“Liverpul”la oyunu tribunadan izləyə bilər
Məlumata görə, “Fənərbağça” rəhbərliyi portuqaliyalı mütəxəssisi noyabrın 4-də “Liverpul”la keçiriləcək qarşılaşmadan əvvəl İstanbula gətirməyi planlaşdırır. Klubun məqsədi Konseysaonun vacib oyunu tribunadan izləməsidir.
Bununla belə, məşqçinin İstanbula gəlişi və təyinatı ilə bağlı hələlik rəsmi açıqlama verilməyib.
Joze Jezusdan müsbət rəy
“Fənərbağça”nın sabiq baş məşqçisi Joze Jezusun da Konseysao ilə bağlı müsbət rəy bildirdiyi iddia olunur. Məlumata əsasən, klub rəhbərliyinin fikrini öyrəndiyi Jezus həmyerlisi barədə “Onda öz gəncliyimi görürəm” ifadəsini işlədib.
“Porto”da 7 mövsümə 11 titul
Serjio Konseysao məşqçilik karyerasına 2012-ci ildə başlayıb. O, “Olhanense”, “Akademika”, “Braqa”, “Vitoriya Gimaraeş” və Fransanın “Nant” klublarında çalışıb.
Portuqaliyalı mütəxəssis 2017-ci ildə “Porto”nun baş məşqçisi təyin olunub. Komandaya yeddi mövsüm rəhbərlik etdiyi müddətdə üç dəfə ölkə çempionu olub, dörd Portuqaliya Kuboku, üç Superkubok və bir Liqa Kuboku qazanıb.
2024-cü ilin dekabrında “Milan”ın başına keçən Konseysao İtaliya klubu ilə Superkubokun qalibi olub. Lakin 2025-ci ilin mayında komandadan ayrılıb. Onun son iş yeri Səudiyyə Ərəbistanının “Əl-İttihad” klubu olub. Mütəxəssis 2026-cı ilin iyununda bu klubla yollarını ayırıb.
Qeyd edək ki, Konseysaonun məşqçilik karyerasında ümumilikdə 12 titul var.
