Afət Ziyadqızı
İran İslam Respublikası Ermənistan Respublikası ilə sıx və məhsuldar diplomatik əlaqələri saxlayır və rəsmi Tehran İrəvanın İranın milli təhlükəsizlik maraqlarına qarşı hər hansı ziddiyyətli addım atmayacağına tam əmindir. İranın xarici işlər naziri Abbas Əraqçi bu barədə İrəvanda keçirilən BMT-nin Bioloji Müxtəliflik haqqında Konvensiyasının Tərəflər Konfransının 17-ci sessiyası (COP17) çərçivəsində jurnalistlərin suallarını cavablandırarkən bəyan edib.
"Operativ Məlumat Mərkəzi-OMM" xəbər verir ki, A.Əraqçi “Tramp marşrutu” (TRIPP layihəsi) çərçivəsində meydana çıxan regional narahatlıqlara toxunaraq, tərəflər arasında məsləhətləşmələrin fasiləsiz davam etdiyini diqqətə çatdırıb.
İranlı diplomat qeyd edib ki, İran Prezidenti Məsud Pezeşkian Ermənistanın Baş naziri Nikol Paşinyanla son iki həftə ərzində ikinci dəfə ikitərəfli görüş keçirəcək. Bu dinamika Tehranın İrəvan rəhbərliyi ilə dialoqa verdiyi xüsusi önəmin göstəricisidir.
Xatırladaq ki, Ermənistanın xarici işlər naziri Ararat Mirzoyan bundan əvvəl İran tərəfinin “Tramp marşrutu”nda ABŞ hərbçilərinin və ya hərbi kontingentinin yerləşdirilib-yerləşdirilməyəcəyi ilə bağlı İrəvana rəsmi sorğu ünvanladığını və buna mənfi cavab aldığını bildirmişdi. Mirzoyan, həmçinin Tehranın TRIPP layihəsinə münasibətinin Ermənistan cəmiyyətində bəzən yanlış və ya məqsədli şəkildə şişirdilərək təqdim olunduğunu iddia etmişdi.
Eyni zamanda, İranın Ermənistandakı səfiri Xəlil Şirqolami cari ilin iyul ayında Tehranın TRIPP layihəsi üzrə mövcud sualları aradan qaldırmaq məqsədilə ikitərəfli xüsusi məsləhətləşmə və fikir mübadiləsi mexanizminin yaradılmasını İrəvana təklif etdiyini demişdi. Diplomat ABŞ Prezidenti Donald Trampın İran xalqına qarşı tətbiq etdiyi sanksiya və təzyiq siyasətini əsas gətirərək, bu layihə ilə bağlı narahatlıqların dostluq və mehriban qonşuluq ruhunda həll olunmasının vacibliyini vurğulamışdı.
