Afət Ziyadqızı
İranın mərhum ali rəhbəri Əli Xameneinin nəşi Qum şəhərində dəfn mərasimi üçün hazırlanır.
"Operativ Məlumat Mərkəzi-OMM" xəbər verir ki, bu barədə "The Times" nəşri diplomatik mənbələrə istinadən məlumat yayıb.
Nəşrin məlumatına görə, kəşfiyyat orqanları Qumda birdən çox şəxsin dəfni üçün nəzərdə tutulan nəhəng məqbərənin inşasına başlanmasına dair əlamətlər aşkar ediblər.
Bundan başqa İranın dövlət xəbər agentlikləri isə 86 yaşında həlak olan Xameneinin ölkənin şimal-şərqində yerləşən, həmçinin ziyarətgah mərkəzlərindən sayılan doğma Məşhəd şəhərində torpağa tapşırılacağını bildirmişdilər. Tarix hələlik açıqlanmasa da, paytaxt Tehranda mərhum rəhbərlə kütləvi vida mərasiminin keçirilməsi planlaşdırılır. Çərşənbə günü, aprelin 8-də Xameneinin həlak olmasından 40 gün keçəcək və bu, matəm dövrünün başa çatması deməkdir.
Məlumatda qeyd olunub ki, Tehrandan 130 km cənubda yerləşən Qum şəhəri şiələr üçün müqəddəs hesab olunur və ölkənin dini paytaxtı rolunu oynayır. Bundan əvvəl İran rəsmiləri dəfn mərasiminin yubanmasını iştirakçıların sayının çox olacağı ehtimalı ilə əlaqələndirmişdilər. Lakin dini ənənələrə görə cənazənin dərhal dəfn olunması tələbi fonunda bu gecikmə müəyyən suallar doğurur.
