İspaniya La Liqasının XXXII turunda növbəti oyun keçirilib.

AZƏRTAC xəbər verir ki, turun mərkəzi matçı "Real Madrid" və "Barselona" arasında baş tutan "El-Klassiko" olub. "Santyaqo Bernabeu" stadionunda reallaşan görüş meydan sahiblərinin qələbəsi ilə yekunlaşıb - 3:2.

Derbidə hesabı 6-cı dəqiqədə qonaqların heyətində Andreas Kristensen açıb. 18-ci dəqiqədə Vinisius Junior penaltidən tablodakı rəqəmləri bərabərləşdirib. Fermin Lopez 69-cu dəqiqədə yenidən komandasını önə keçirib. 73-cü dəqiqədə Lukas Vasqes hesabı 2:2 edib. Geri dönüş edən "kral klubu"nun qələbə qolunu 90+1-ci dəqiqədə Cud Bellinqem vurub.

Bu nəticədən sonra xallarını 81-ə çatdıran "Real Madrid" turnir cədvəlinə başçılıq edir. "Barselona" 70 xalla ikinci, 68 xallı "Jirona" isə üçüncü pillədə qərarlaşıb.

“Qarabağ” klubu futbolçusu Nəriman Axundzadə ilə müqavilənin müddətini uzadıb.

Klubdan "Operativ Məlumat Mərkəzi-OMM"-ə verilən məlumata görə, 20 yaşlı hücumçu ilə yeni müqabilə dörd il müddətinə nəzərdə tutulub.

Qeyd edək ki, N.Axundzadə “köhlən atlar”ın heyətində bu mövsüm 43 matçda 15 qol və 1 məhsuldar ötürmə ilə yadda qalıb.

"Real Madrid" komandası cari mövsümünün sonuna 4 tur qalmış İspaniya “La Liga”sının qalibi olub.

"Operativ Məlumat Mərkəzi-OMM" xəbər verir ki, Karlo Ancellotinin yetirmələri buna "Kadis" klubuna (3-0) qalib gəlməsindən və "Barselona"nın səfərdə "Jirona"ya uduzmasından (2:4) sonra nail olublar.

Qeyd edək ki, bu, İspaniya nəhənginin 36-cı “La Liga” çempionluğu olub.

Azərbaycan Premyer Liqasın XXXIII turu çərçivəsində daha bir oyun keçirilib.

"Operativ Məlumat Mərkəzi-OMM" xəbər verir ki, "Qarabağ" "Neftçi"ni qəbul edib.

İnqilab Məmmədovun idarə etdiyi qarşılaşmada "Qarabağ" 5:0 hesablı qələbə qazanıb. Ağdam təmsilçisinin heyətində 12 və 77-ci dəqiqələrdə Nəriman Axundzadə, 41-ci dəqiqədə Toral Bayramov fərqlənib. "Qarabağ"ın digər qollarını isə 66-cı dəqiqədə Leandro Andrade, 85-ci dəqiqədə Abdullah Zubir vurub.

"Neftçi"nin futbolçusu Yuri Matias 78-ci dəqiqədə qırmızı vərəqə ilə meydandan qovulub.

Bu gün, baş tutan digər görüşdə "Kəpəz"lə "Sumqayıt" heç-heçə edib - 1:1.

Qeyd edək ki, turun digər oyunları mayın 5-i və 6-da keçiriləcək.

Azərbaycan Premyer Liqasında XXXIII tura start verilib.

"Operativ Məlumat Mərkəzi-OMM" xəbər verir ki, turun ilk oyunu Tovuzda şəhər stadionunda baş tutub.

“Kəpəz” “Sumqayıt”ı qəbul edib. İnqilab Məmmədovun idarə etdiyi qarşılaşmada qalib müəyyənləşməyib - 1:1. Qonaqların heyətində 80-ci dəqiqədə Cordan Rezabala fərqlənib. Gəncə təmsilçisinin bərabərlik qolunu isə 90+5-ci dəqiqədə Elçin Əlicanov vurub.

“Sumqayıt” 51 xalla turnir cədvəlinin ikinci pilləsində qərarlaşıb. Səkkizinci olan “Kəpəz”in hesabında 35 xal var.

Bu gün, saat 19:30-da turun mərkəzi qarşılaşması sayılan “Qarabağ” - “Neftçi” matçı başlayacaq.

Qeyd edək ki, turun digər oyunları mayın 5-i və 6-da keçiriləcək.

"Bavariya" yeni baş məşqçi axtarışlarını davam etdirir.

"Operativ Məlumat Mərkəzi-OMM" "Tuttomercatoweb" portalına istinadla xəbər verir ki, "Bavariya" Roberto de Zerbini ilə maraqlanır. 

Bundesliqa nəhəngi artıq "Brayton"un çalışdırıcısının ətrafı ilə əlaqə saxlayıb.

44 yaşlı mütəxəssisə "Milan" və "Napoli"nin də marağı olduğu bildirilir. İtalyanın "Brayton"la hazırkı müqaviləsi 2026-cı ilin yayına kimi nəzərdə tutulub.

Qeyd edək ki, "Bavariya"ya mövsüm başa çatdıqdan sonra vəzifəsini tərk edəcək Tomas Tuxel rəhbərlik edir.