Milyarder Ceff Bezosun rəhbərlik etdiyi "Blue Origin" şirkəti qlobal məlumat trafikini kosmosa daşıyacaq “TeraWave” adlı yeni rabitə şəbəkəsini təqdim edib.
"Operativ Məlumat Mərkəzi-OMM" xarici KİV-ə istinadən xəbər verir ki, bu şəbəkə saniyədə 6 Terabit (Tbps) sürətlə məlumat ötürmə imkanı ilə müasir standartları qat-qat üstələyəcək.
Layihə çərçivəsində Yer ətrafı orbitlərdə ümumilikdə 5 408 peykin yerləşdirilməsi nəzərdə tutulur. Şəbəkənin əsas texniki göstəriciləri aşağıdakı kimidir:
- Aşağı Yer Orbiti (LEO) peykləri 144 Qbit/s sürət təmin edəcək;
- Orta Yer Orbiti (MEO) peykləri optik bağlantılar vasitəsilə 6 Tbps sürətə çatacaq;
- Yükləmə (upload) və endirmə (download) sürətləri bərabər səviyyədə olacaq.
Bu xidmət fərdi istifadəçilərdən çox, böyük məlumat mərkəzləri, bulud provayderləri və müdafiə sənayesi kimi "sənaye miqyaslı" internetə ehtiyacı olan təxminən 100 min xüsusi müştəri üçün nəzərdə tutulub. Lazer (optik) texnologiyası sayəsində məlumatlar işıq sürəti ilə ötürüləcək ki, bu da həm yüksək tutum, həm də kənar müdaxilələrdən qorunmaq üçün maksimum təhlükəsizlik deməkdir.
Peyklərin orbitə buraxılmasına 2027-ci ildə başlanılması planlaşdırılır. Missiyanın icrasında "Blue Origin"in öz istehsalı olan nəhəng “New Glenn” raketlərindən istifadə olunacaq.
