Dörd Azərbaycan cüdoçusu dünya çempionatında mübarizəyə başlayır

Azərbaycanın daha dörd cüdoçusu Bakıda keçirilən dünya çempionatında mübarizəyə başlayacaq. Hanna Zaytseva 63 kq, Vüsal Qələndərzadə, Zelim Tçkayev və Ömər Rəcəbli isə 81 kq çəki dərəcəsində çıxış edəcəklər.

Zaytseva 1/16 final mərhələsində Pey Çun Yuan (Çin Taypeyi) – Anna Kriza (Macarıstan) qarşılaşmasının qalibi ilə üz-üzə gələcək. Qələndərzadə 1/32 finalda Bolqarıstan təmsilçisi Hristo Valkovla qarşılaşacaq.

Tçkayevin 1/16 finaldakı rəqibi Timoti Meuvsen (Cənubi Afrika Respublikası) – Viktor Sterpu (Moldova) görüşünün qalibi olacaq. Eyni mərhələdə Rəcəbli Sibqatullah Arab (IRT) – Mahamadu Dukara (Mali) duelində üstün olan cüdoçu ilə qarşılaşacaq.

Təsnifat mərhələsinə saat 10:30-da start veriləcək, final bloku isə saat 18:00-da başlayacaq. Milli Gimnastika Arenasında təşkil olunan dünya çempionatı oktyabrın 11-də başa çatacaq.

Azərbaycan təmsilçilərindən Əhməd Yusifov 60 kq çəki dərəcəsində qızıl, Rəşid Məmmədəliyev isə 73 kq-da bürünc medal qazanıb.