ABŞ Prezidenti Donald Tramp Ağ Evdə keçirdiyi mətbuat konfransı zamanı Somali barədə qalmaqallı açıqlamalar verib.
"Operativ Məlumat Mərkəzi-OMM" xarici KİV-ə istinadən xəbər verir ki, Amerika lideri bu ölkəni müstəqil dövlət kimi tanımadığını və oradakı vəziyyətin acınacaqlı olduğunu bildirib.
Tramp öz çıxışında əslən Somalidən olan Konqres üzvü İlhan Ömarı tənqid edərkən bu ölkənin idarəetmə sistemini hədəf alıb.
O, Somalinin tamamilə korrupsiyaya uğradığını vurğulayaraq bu fikirləri səsləndirib:
"Bura ölkə deyil. Onların hökuməti, heç bir şeyi yoxdur. Bu, geri qalmış bir yerdir, bəlkə də dünyanın ən pis ölkəsidir. Əgər bura ümumiyyətlə ölkə demək mümkündürsə. Orada heç bir təşkilatlanma yoxdur. Nə polis, nə də silahlı qüvvələr mövcuddur".
Qeyd edək ki, Donald Trampın bu bəyanatları beynəlxalq ictimaiyyətdə və diplomatik dairələrdə geniş müzakirələrə yol açıb. Prezident Somalinin dövlət strukturundan məhrum olduğunu və xaotik bir məkan olduğunu iddia edir.
