Afət Ziyadqızı
Danimarka hökuməti Baltik dənizində Rusiya hərbi gəmisindən Danimarka Hərbi Hava Qüvvələrinə məxsus helikopterə işıq fişənglərinin atılması ilə bağlı Rusiyanın Kopenhagendəki səfirini Xarici İşlər Nazirliyinə çağırıb.
“Operativ Məlumat Mərkəzi-OMM” xəbər verir ki, bu barədə Danimarka Xarici İşlər Nazirliyi və Müdafiə Komandanlığı məlumat yayıb.
Məlumata görə, insident Gedser sahillərində, beynəlxalq sularda yerləşən Rusiya freqatına qarşı Danimarka HHQ-nin “Fennec” tipli helikopterinin həyata keçirdiyi rutin fotoçəkiliş və müşahidə missiyası zamanı qeydə alınıb. Rusiya hərbi gəmisi helikopter istiqamətində iki işıq fişəngi buraxıb və onlardan biri təyyarənin bilavasitə yaxınlığından keçib. Hərbi aviasiya ekspertləri və Danimarka HHQ komandanlığı bu cür addımın açıq qapı şəraitində çəkiliş aparan heyət və rotorlu hava vasitəsi üçün birbaşa uçuş təhlükəsizliyi riski yaratdığını vurğulayıblar.
Danimarkanın xarici işlər naziri Lars Löke Rasmussen baş verənləri “tamamilə qəbuledilməz” adlandıraraq, Moskvanın davranış sərhədlərini tədricən aşmağa çalışdığını bəyan edib. Baş nazir Mette Frederiksen isə bunu Avropa ölkələrini qorxutmaq və bölmək məqsədi daşıyan məsuliyyətsiz hərəkət kimi qiymətləndirib. Müdafiə naziri Jeppe Bruus insidentlə bağlı parlament partiyalarına brifinq verildiyini, müttəfiqlərlə məsləhətləşmələrin davam etdiyini, lakin hazırda NATO müqaviləsinin 4-cü və ya 5-ci maddələrinin işə salınması üçün əsas görmədiklərini bildirib.
Rusiyanın Danimarkadakı səfiri Vladimir Barbin isə Moskvanın insidentin təfərrüatlarını araşdıracağını bildirib, lakin Danimarka helikopterini Rusiya hərbi gəmisi yaxınlığında təhlükəli manevrlər etməkdə və təxribat törətməkdə günahlandırıb.
Eyni zamanda, NATO qırıcıları Litva hava məkanına Belarus ərazisindən daxil olan və partlayıcı daşıdığı ehtimal edilən pilotsuz uçuş aparatını vurub. Avropa Komissiyasının sədri Ursula fon der Leyen və NATO nümayəndələri hər iki insidenti Rusiyanın aliansa qarşı həyata keçirdiyi genişmiqyaslı gərginləşdirmə və təxribat cəhdlərinin tərkib hissəsi kimi dəyərləndiriblər.
