Afət Ziyadqızı
Danimarkanın Baş naziri Mette Frederiksen sosial şəbəkə hesabında başına gələn maraqlı hadisəni ictimaiyyətlə bölüşüb.
“Operativ Məlumat Mərkəzi – OMM” xəbər verir ki, Ukrayna səfərindən qayıdan 48 yaşlı siyasətçiyə estetik cərrah şəxsi mesaj yazaraq burnundakı kiçik ləkənin aradan qaldırılmasını təklif edib.
Frederiksen illərdir xarici görünüşü ilə bağlı müxtəlif şərhlərlə qarşılaşdığını bildirib. Baş nazir ona dişlərinin forması, saçlarının nazik olması və botoks etdirməsi ilə bağlı çoxsaylı mesajlar göndərildiyini qeyd edib.
Estetik cərrahın adını açıqlamayan Frederiksen ona verdiyi cavabı da ictimailəşdirib. O, öz görünüşündən məmnun olduğunu və xüsusilə kişi cərrahın bu barədə fikrinə ehtiyac duymadığını vurğulayıb.
2019-cu ildən Danimarkanın Baş naziri olan Frederiksen qadınların yaşlandıqca xarici görünüşləri ilə bağlı təzyiqlərə məruz qalmasını da tənqid edib. O, insanları belə məsələlərə vaxt sərf etməkdənsə, daha vacib mövzulara diqqət yetirməyə çağırıb.
Baş nazir həmçinin burnundakı kiçik fərqliliyin müzakirə mövzusuna çevrilməsindən narazılığını ifadə edib və öz görünüşünü olduğu kimi qəbul edən hər kəsə dəstək mesajı verib.
