OMM Redaksiyası
“Sabah”ın baş məşqçisi Valdas Dambrauskas “Arab News” nəşrinə müsahibəsində komandanın Çempionlar Liqasındakı debütünü dəyərləndirib. Litvalı mütəxəssis bildirib ki, klub dörd təsnifat mərhələsini keçərək turnirə vəsiqə qazanıb. Bundan sonrakı uğurları isə əlavə nailiyyət sayacaqlar.
Dambrauskas püşkatmanın “Sabah” üçün çətin olduğunu, komandanın dünyanın güclü klubları ilə qarşılaşacağını deyib. Onun sözlərinə görə, bu oyunlar nəticələrdən başqa, klubun və Azərbaycanın tanıdılması baxımından da əhəmiyyətlidir.
Səfərlərdə 34 min kilometr
Baş məşqçi ilk turda “Mançester Yunayted”ə 0:4 hesablı məğlubiyyətə də toxunub. O, futbolçuların rəqibdən və stadiondakı atmosferdən çəkinmədiyini, lakin taktiki tərəddüdlərin olduğunu bildirib. Dambrauskasın fikrincə, bu səviyyədə rəqiblər ən kiçik səhvləri belə cəzalandırır.
Mütəxəssis dörd səfər oyunu üçün komandanın ümumilikdə 34 min kilometr yol qət edəcəyini qeyd edib. Gediş məsafəsinin 17 min kilometr olacağını deyən məşqçi, geri dönüşlə birlikdə bu yolun Yer kürəsinin çevrəsinə yaxınlaşdığını vurğulayıb.
Azərbaycan futbolunu tanıtmaq hədəfi
Dambrauskas sıx təqvim səbəbindən meydanda məşqlərə daha az vaxt qalacağını, videoanaliz və fərdi söhbətlərin önəminin artacağını bildirib. O, “Sabah”ın “Qarabağ”dan sonra Çempionlar Liqasının əsas mərhələsinə yüksələn ikinci Azərbaycan klubu olmasını ölkə futbolu üçün tarixi uğur adlandırıb.
2017-ci ildə yaradılan “Sabah” ötən mövsüm Azərbaycan çempionu olub və ölkə kubokunu qazanıb. Komanda liqa mərhələsində ikinci oyununu bu gün Bakı Olimpiya Stadionunda “Slaviya”ya (Praqa) qarşı keçirəcək. Görüş saat 20:45-də başlayacaq.
