Çində elektromobillərdə geniş istifadə olunan minimalist, gövdəyə inteqrasiya edilmiş gizli qapı tutacaqları ilə bağlı 4 milyondan çox avtomobilin geri çağırılmasına qərar verilib.
“Operativ Məlumat Mərkəzi-OMM” xəbər verir ki, bununla bağlı xarici KİV məlumat yayıb.
Geri çağırılan avtomobillər arasında Çində istehsal olunan və idxal edilən təxminən 2,98 milyon "Tesla" da var.
Bundan başqa, "XPeng", "Xiaomi" və "Geely" kimi Çin avtomobil istehsalçılarının modelləri də kampaniyaya daxil edilib.
Geri çağırılmanın əsas səbəbi fövqəladə hallar zamanı qapı tutacaqlarının tapılmasının və açılmasının çətin olmasıdır.
"Tesla"nın populyarlaşdırdığı bu dizayn normal şəraitdə avtomobilin kuzovuna tam inteqrasiya olunur və sürücü yaxınlaşdıqda çölə çıxır.
Qapı tutacaqları xüsusilə elektrik sisteminin sıradan çıxması zamanı təhlükə yarada bilər. Belə hallarda avtomobilin aşağı gərginlik sistemi fəaliyyətini dayandırdıqda həm sərnişinlərin, həm də xilasetmə əməkdaşlarının qapıları tez açması çətinləşə bilər.
Məsələ "Xiaomi" avtomobillərinin iştirakı ilə baş verən və elektrik nasazlığı səbəbindən qapıların açıla bilmədiyindən şübhələnilən iki ölümcül qəza fonunda da gündəmə gəlib.
"Tesla" açıqlamasında "Model 3", "Model Y", "Model S" və "Model X" modellərinin geri çağırıldığını bildirib. Şirkətə görə, qapı tutacaqlarının salonun rənginə yaxın olması onların fövqəladə vəziyyətdə müəyyən edilməsini və istifadəsini çətinləşdirə bilər. "Tesla" problemin qarşısını almaq üçün avtomobillərə xəbərdarlıq etiketləri yerləşdirəcək və qəza zamanı şüşələrin avtomatik endirilməsini təmin edən proqram yeniləməsi təqdim edəcək.
Mütəxəssislər isə bu tədbirlərin problemin tam həlli olmadığını bildirirlər. "Sino Auto Insights" şirkətinin təsisçisi Tu Le gizli qapı tutacaqlarının 2014-cü ildən etibarən "Tesla Model S"in dizaynının digər istehsalçılar tərəfindən sürətlə mənimsənilməsi nəticəsində geniş yayıldığını deyib. Onun sözlərinə görə, etiket və proqram yeniləmələri daha çox müvəqqəti tədbir xarakteri daşıyır.
Çin hakimiyyəti artıq gizli qapı tutacaqlarının istifadəsini məhdudlaşdırmağa hazırlaşır. 1 yanvar 2027-ci ildən qüvvəyə minəcək yeni qaydalara əsasən, Çində satılan avtomobillərin həm daxili, həm də xarici qapılarında mexaniki açma mexanizmi olmalıdır.
Gizli qapı tutacaqları ABŞ-də da təhlükəsizlik baxımından araşdırılır. "Tesla" avtomobillərinin qapı tutacaqlarının qəfil işləməməsi və uşaqların avtomobillərdə bağlı qalması ilə bağlı şikayətlərdən sonra ABŞ Milli Avtomobil Yolları Hərəkətinin Təhlükəsizliyi Administrasiyası (NHTSA) iyul ayında bütün avtomobil istehsalçıları üçün yeni təhlükəsizlik standartının tətbiqini təklif edib.
