Fövqəladə Hallar Nazirliyi qarşıdan gələn Novruz çərşənbələri ilə əlaqədar əhaliyə müraciət ünvanlayaraq, yanğın təhlükəsizliyi qaydalarına ciddi riayət etməyə çağırıb.
Bu barədə "Operativ Məlumat Mərkəzi-OMM"-ə nazirlikdən məlumat verilib.
Nazirlik bayram mərasimlərinin təşkili zamanı aşağıdakı zəruri tədbirlərə əməl etməyi tövsiyə edir:
- Bayram tonqalı ev, avtomobil, elektrik naqili, ağac və digər yanar əşyalardan kənarda yandırılmalıdır;
- Tonqalın ətrafına yığışan azyaşlılar mütləq böyüklərin nəzarətində olmalıdır;
- Tonqal üzərindən atılarkən ehtiyatlı davranılmalıdır;
- Tonqal tam sönənədək nəzarətdə saxlanılmalıdır;
- Süfrələrdə yandırılan şamlar nəzarətsiz qalmamalıdır.
Həmçinin, nəzərə alınmalıdır ki, küləkli hava şəraitində tonqal yandırılması xüsusilə təhlükəli hesab olunur.
