Fövqəladə Hallar Nazirliyi (FHN) qarşıdan gələn Od çərşənbəsi ilə əlaqədar əhaliyə vacib müraciət ünvanlayıb.
Bu barədə “Operativ Məlumat Mərkəzi-OMM”-ə nazirlikdən rəsmi məlumat verilib.
Bildirilib ki, çərşənbə mərasimlərində, xüsusilə tonqal qalanması zamanı yanğın təhlükəsizliyi qaydalarına riayət edilməməsi, bayram sevincinin arzuolunmaz və acı nəticələrlə sonlanmasına səbəb ola bilər.
Qeyd olunanlarla bağlı Fövqəladə Hallar Nazirliyi əhaliyə bir daha xəbərdarlıq edərək, Novruz bayramı ilə əlaqədar mərasimlərin təşkili zamanı təhlükəsizlik qaydalarına ciddi riayət etməyə çağırır:
"Bayram tonqalı tikili, avtomobil, elektrik naqili, ağac və digər yanar əşyalardan kənarda yandırılmalıdır.
Tonqalın ətrafına yığışan azyaşlılar mütləq böyüklərin nəzarətində olmalı, tonqal üzərindən atılarkən ehtiyatlı davranılmalıdır.
Tonqal tam sönənədək nəzarətdə saxlanılmalı, süfrələrdə yandırılan şamlar nəzarətsiz qalmamalıdır".
Həmçinin, nəzərə alınmalıdır ki, küləkli hava şəraitində tonqal yandırılması xüsusilə təhlükəli hesab olunur.
