Seul hökuməti ölkənin ilk mülki nüvə sığınacağını inşa etməyə hazırlaşır.
"Operativ Məlumat Mərkəzi-OMM" xəbər verir ki, bununla bağlı xarici KİV məlumat yayıb.
Bildirilib ki, 2028-ci ildə tamamlanması planlaşdırılan bu obyekt mümkün hücum halında min nəfərdən çox insana iki həftəlik yaşayış imkanı təmin edəcək.
Seul şəhərində tikilən yeni yaşayış kompleksinin altında yerləşəcək bu sığınacaq eyni zamanda ictimai idman zalı kimi də istifadə olunacaq.
Kompleksin üçüncü zirzəmisində yerləşəcək obyektin sahəsinin 2 min 100 kvadratmetrdən böyük olacağı və 1.020 nəfəri qəbul edə biləcəyi bildirilib.
2028-ci ildə tamamlanması nəzərdə tutulan layihə, 16 çoxmərtəbəli bina və 1.200-dən çox mənzili əhatə edən geniş bir yaşayış kompleksinin tərkibində olacaq.
Sığınacaqda xüsusi havalandırma sistemi, təmiz su anbarı və tullantı idarəetmə sistemi qurulacaq. Bu sistemlər sayəsində nüvə, kimyəvi və ya bioloji hücum vəziyyətində iki həftəlik davamlı həyat şəraiti təmin olunması hədəflənir.
Təcili hallar istisna olmaqla obyekt adi vaxtlarda ictimai fitnes mərkəzi kimi fəaliyyət göstərəcək.
