Bayram günlərində avtovağzalların iş rejimi necə olacaq?
Novruz və Ramazan bayramları ərəfəsində sərnişinlərin rahatlığını təmin etmək məqsədilə ölkə üzrə bütün avtovağzal və avtostansiyalar 19-30 mart tarixlərində gücləndirilmiş iş rejimində fəaliyyət göstərəcək.
Bu barədə “Operativ Məlumat Mərkəzi-OMM” Rəqəmsal İnkişaf və Nəqliyyat Nazirliyi yanında Azərbaycan Yerüstü Nəqliyyat Agentliyi (AYNA) istinadən xəbər verir.
Sərnişin sıxlığının qarşısı necə alınacaq?
Məlumata görə, AYNA şəhərlərarası və rayonlararası marşrutlar üzrə sərnişindaşıma şirkətlərinə fasiləsiz və təhlükəsiz hərəkətin təmin edilməsi üçün müvafiq tapşırıqlar verib. Əsas hədəf kassalardan tariflərə uyğun biletlərin qanuni satışını təşkil etmək və bayram günlərində yarana biləcək sıxlığın qarşısını almaqdır.
Bununla yanaşı, avtobusların təsdiq edilmiş cədvəl üzrə hərəkət qrafiklərinə ciddi riayət etməsi xüsusi nəzarətdə saxlanılacaq.
Bakı Beynəlxalq Avtovağzal Kompleksində (BBAK) sərnişin axınına uyğun olaraq xətlərə buraxılan avtobusların intervalına və sürücülərin təhlükəsizlik qaydalarına əməl etmələrinə diqqət yetiriləcək. Sıxlığı tənzimləmək üçün xəttə lazımi sayda əlavə avtobus buraxılması təmin ediləcək.
Avtobus biletlərini onlayn və sürətli necə əldə etmək olar?
Vətəndaşlar səyahət biletlərini https://biletim.az/ portalından onlayn qaydada, həmçinin avtovağzalların rəsmi kassalarından əldə edə bilərlər.
Biletim.az portalının statistikası və üstünlükləri
Hazırda portal vasitəsilə 58 məntəqə və 91 istiqamət üzrə bilet almaq mümkündür. Rəqəmsal sistemə ümumilikdə 355 reys olmaqla 403 nəqliyyat vasitəsi qoşulub.
Onlayn portal vaxta qənaət, müştəri məmnuniyyətinin artırılması və ölkədə nağdsız ödəniş dövriyyəsinin genişləndirilməsi baxımından mühüm üstünlüklərə malikdir.
Vətəndaşlara daha rahat və təhlükəsiz mənzil başına çatmaq üçün biletləri əvvəlcədən biletim.az portalı vasitəsilə əldə etmələri tövsiyə olunur.
