OMM Redaksiyası
Bakıda cüdo üzrə dünya çempionatının dördüncü yarış günü Azərbaycan millisinin iki medalı və bir sıra maraqlı qarşılaşmalarla yadda qalıb. 81 kq çəki dərəcəsində Zəlim Tsaqayev finalda gürcü Tato Qriqalaşviliyə uduzaraq gümüş medal qazanıb. Təxminən 10 dəqiqə davam edən görüşdə qalib əlavə vaxtda müəyyənləşib. Qriqalaşvili bununla dördüncü dəfə dünya çempionu olub.
Eyni çəkidə Ömər Rəcəbli bürünc medal uğrunda görüşdə qazaxıstanlı Abilayxan Jubanazarı məğlub edib. O, bu nəticə ilə atası Elxan Rəcəblinin 2001-ci ildə dünya çempionatında qazandığı bürünc medalı təkrarlayıb. Ata və oğul eyni çəkidə, ilk böyüklərarası dünya çempionatlarında eyni nəticəyə nail olublar.
Günün sürprizlərindən biri altıqat dünya çempionu Klariss Aqbenyenunun çıxışı olub. İkinci övladının doğulmasından yeddi ay sonra mundiala qayıdan fransalı cüdoçu 1/4 finalda macarıstanlı Anna Krizaya, daha sonra təsəlliverici görüşdə monqolustanlı Enxriilen Lxaqvaqooya uduzub və yarışı yeddinci yerdə başa vurub. Kriza isə yarımfinal və bürünc medal görüşündə məğlub olaraq beşinci olub.
63 kq-da yaponiyalı Haruka Kacu dünya çempionu titulunu qoruyub, IJF Dünya Turu yarışlarında ardıcıl qələbələrinin sayını 40-a çatdırıb. Bakıdakı mundial İran cüdoçularının 2019-cu ildən sonra böyüklər arasında dünya çempionatına qayıdışı ilə də seçilib. İranı təmsil edən İlyas Pərhizqar ilk görüşündə uduzub. Dördüncü günün yekununda Azərbaycan 1 qızıl, 1 gümüş və 2 bürünc medalla sıralamada ikinci olub. Çempionat oktyabrın 11-dək davam edəcək.
