Azərbaycanda Bakı İqlim Fəaliyyəti Həftəsi (BİFH) keçirilir.

"Operativ Məlumat Mərkəzi-OMM" xəbər verir ki, sentyabrın 30-dan oktyabrın 4-dək davam edəcək tədbir ictimaiyyətin noyabrda Bakıda keçiriləcək BMT-nin İqlim Dəyişikliyi üzrə Çərçivə Konvensiyasının Tərəflər Konfransının 29-cu sessiyası (COP29) hazırlaşdığı vaxtda iqlim gündəliyinin əsasını təşkil edəcək.

BİFH siyasət, maliyyə, ticarət, investisiya, elm, incəsənət, mədəniyyət kimi bir sıra sahələrdən vətəndaş cəmiyyətlərindən və mediadan əsas maraqlı tərəfləri bir araya gətirir.

Tədbirin rəsmi açılış mərasimində ekologiya və təbii sərvətlər naziri, COP29-un müəyyən olunmuş prezidenti Muxtar Babayev, COP29-un Yüksək Səviyyəli Çempionu Nigar Arpadarai, iqtisadiyyat naziri Mikayıl Cabbarov, energetika naziri Pərviz Şahbazov, digər rəsmilər və xarici qonaqlar iştirak edir.

Rəsmi açılış mərasimindən sonra Bakı İqlim Fəaliyyəti Həftəsi müxtəlif sahələrə həsr olunan panellərlə davam edəcək.

Bakıda keçiriləcək COP29 iqlim konfransı əsas hadisə olmaqla yanaşı, həm də çətin danışıqlar prosesi olacaq.

"Operativ Məlumat Mərkəzi-OMM" xəbər verir ki, bunu Lüksemburqda jurnalistlərə açıqlamasında Avropa İttifaqının iqlimin mühafizəsi üzrə komissarı Vopke Hukstra deyib.

“Mən Bakıdan yenicə qayıtmışam, burada dünyanın müxtəlif ölkələrindən olan tərəfdaşlarla iqlim dəyişikliyi ilə bağlı əlavə tədbirlərin maliyyələşdirilməsinə başlamaq və “BƏƏ konsensusu”nun – bir il ərzində əldə olunmuş bütün qərar və sazişlərin həyata keçirilməsini təmin etməklə bağlı məhsuldar ilkin müzakirələr apardıq. Keçən həftə Bakıda gəldiyim qənaətləri bu gün Şurada müzakirə edəcəyik. Biz həmçinin növbəti müşavirənin parametrlərini müəyyənləşdirəcək və bir sıra digər məsələləri həll edəcəyik. Bütün bunlar bir neçə həftə sonra keçiriləcək COP29-a hazırlıq çərçivəsində baş tutacaq”, - o bildirib.

Avropa komissarı izah edib ki, ötən həftə Bakıda BMT-nin İqlim Dəyişmələri üzrə Tərəflərin İlkin Konfransında (Pre-COP29) iştirakı zamanı iqlim dəyişikliyi ilə mübarizə tədbirlərinin maliyyələşdirilməsinin bütün iştirakçılardan daha çox səy tələb edəcəyini vurğulayıb.

"Bura həm özəl, həm də dövlət sektorundan maliyyənin cəlb edilməsi daxildir. Bizim avropalıların sadiqliyi ilə yanaşı, həm də ödəmə qabiliyyətinə malik digər ölkələrin də məsuliyyəti öz üzərinə götürəcəyinə əminliyə ehtiyacımız var. Fikrimcə, biz bu gün Lüksemburqda Aİ ölkələrinin iqlim nazirlərinin görüşündə əsasən üç məsələni müzakirə edəcəyik. Birincisi, mövcud vəsaitin həcmini necə artırmaq olar? İkincisi, bu vəsaitin ən çox ehtiyacı olanlara, o cümlədən kiçik ada dövlətlərinə və xüsusilə Afrikada ən az inkişaf etmiş ölkələrə çatmasını təmin etmək üçün nə lazımdır? Üçüncüsü, donor bazasını necə genişləndirə bilərik, çünki bu, çox önəmlidir. Daha çox ölkənin fəal iştirak etməsi vacibdir”, - o əlavə edib.

Braziliya Prezidenti Luis İnasiu Lula da Silva BMT-nin İqlim Dəyişikliyi üzrə Çərçivə Konvensiyasının Tərəflər Konfransının 29-cu sessiyasında (COP29) iştirak etmək üçün Azərbaycana gələcək.

Bu barədə "Operativ Məlumat Mərkəzi-OMM"-ə Braziliya Xarici İşlər Nazirliyinin iqlim, enerji və ətraf mühit üzrə katibi Andre Korrea du Laqu məlumat verib.

O vurğulayıb ki, COP29 konfransı qarşıdan gələn COP30-a ev sahibliyi edəcək ölkə kimi Braziliya üçün son dərəcə önəmlidir.

“Əlbəttə, COP29 bizim üçün son dərəcə vacibdir, çünki bu tədbirdə yeni Kollektiv Kəmiyyət Hədəfləri - NCQG vasitəsilə maliyyələşdirmə mövzusuna toxunulacaq.

Beləliklə, maliyyələşdirmə ilə bağlı müzakirələr irəlilədikcə biz Milli Səviyyədə Müəyyən Edilmiş Töhfələr (NDC's) üzrə daha səmərəli müzakirələr apara biləcəyik. Bu, Braziliyada keçiriləcək COP30-un əsas mövzusu olacaq", - katib qeyd edib.

COP29-un müəyyən edilmiş prezidenti, ekologiya və təbii sərvətlər naziri Muxtar Babayev Bakıda keçirilən BMT-nin İqlim Dəyişmələri üzrə Tərəflərin İlkin Konfransı (Pre-COP29) çərçivəsində Rusiya Federasiyası Prezidentinin iqlim məsələləri üzrə xüsusi nümayəndəsi Ruslan Edelgeriyev ilə görüşüb.

"Operativ Məlumat Mərkəzi-OMM" xəbər verir ki, bu barədə COP29-un "X" hesabında paylaşım edilib.

Qeyd edilib ki, tərəflər noyabrın 11-22-də Bakıda keçirilən Birləşmiş Millətlər Təşkilatının İqlim Dəyişmələri üzrə Çərçivə Konvensiyasının Tərəflər Konfransının 29-cu sessiyası (COP29) ərəfəsində fikir mübadiləsi aparıb.

COP29-un müəyyən edilmiş prezidenti, ekologiya və təbii sərvətlər naziri Muxtar Babayev Cənubi Sudanın su ehtiyatları və suvarma naziri Pal Nyoai ilə görüşüb.

"Operativ Məlumat Mərkəzi-OMM" xəbər verir ki, bu barədə COP29-un "X" hesabında paylaşım edilib.

Bildirilib ki, su problemi iqlim dəyişikliyinin əsasında dayanır və COP29-da bu mövzuya xüsusi diqqət ayrılacaq.

Həmçinin tərəflər arasında İqlim Fəaliyyəti üçün Su haqqında COP29 Bəyannaməsi müzakirə edilib.

Bakıda noyabr ayında keçiriləcək BMT-nin İqlim Dəyişmələri üzrə Çərçivə Konvensiyasının Tərəflər Konfransının 29-cu sessiyasında (COP29) 60 qərarın qəbul ediləcəyi gözlənilir.

"Operativ Məlumat Mərkəzi-OMM" xəbər verir ki, bunu COP29-un baş danışıqçısı Yalçın Rəfiyev Bakıda keçirilən Pre-COP29-un ikinci günü çərçivəsində iqlim və inkişaf üzrə nazirlərin görüşündə (C&DM) deyib.

Baş danışıqçı bildirib ki, bunlardan əsasları iqlim maliyyəsi və karbon bazarlarının formalaşmasıdır.

Y.Rəfiyevin sözlərinə görə, bu iki qərarın qəbulu tarixi nailiyyət olacaq.