"Real"da oynayan avstriyalı futbolçu David Alaba AVRO-2024-ün seçmə mərhələsinin Azərbaycan millisi ilə görüşünü buraxa bilər.
"Operativ Məlumat Mərkəzi-OMM" "Nachrichten" nəşrinə istinadən xəbər verir ki, buna səbəb müdafiəçinin Çempionlar Liqasının 1/8 finalını “Liverpul”la oyununda (5:2) zədələnməsidir.
O, matçın 27-ci dəqiqəsində bud nahiyəsindən zədə alaraq əvəzlənib. Avstriya millisinin kapitanının bu səbəbdən Azərbaycan və Estoniya millilərinə qarşı keçiriləcək seçmə mərhələ görüşündə iştirakı sual altına düşüb.
Xatırladaq ki, Avstriya yığması martın 24-də Azərbaycan millisini, üç gün sonra isə Estoniyanı qəbul edəcək.
