Avropanın diqqətində olan gənc hücumçu: Sidiki Şerif üçün transfer yarışı qızışır

Liqa 1 təmsilçisi “Angers”in 19 yaşlı fransız-qvineyalı hücumçusu Sidiki Şerif Avropa klublarının maraq dairəsinə düşüb.

"Operativ Məlumat Mərkəzi-OMM" xəbər verir ki, gənc futbolçu ilə “Paris” və İngiltərənin “Crystal Palace” klubları yaxından maraqlanır.

Siyahıda adı çəkilən klublardan biri də “Fənərbaxça”dır.

Məlumatlara görə, Türkiyə nəhəngi Şerifi transferə razı salmaq üçün əlaqələrini intensivləşdirib. Lakin “Angers” rəhbərliyinin gənc hücumçunu bu mərhələdə satmağa razı olub-olmayacağı hələ də qeyri-müəyyəndir.

“Transfermarkt” portalının məlumatına əsasən, 2028-ci ilin iyununa qədər müqaviləsi olan Sidiki Şerif bu mövsüm Liqa 1-də 19 oyunda 4 qol vurub. Onun hazırkı bazar dəyəri 7 milyon avro olaraq göstərilir.

Bildirilir ki, 2026-cı ilin yanvarında “Angers” futbolçu üçün 25–30 milyon avro aralığında qiymət müəyyən edib. Həmin dövrdə “Paris”in 25 milyon avroya qədər olan təklifi rədd edilib, “Crystal Palace”ın isə 20 milyon avroya qədər təkliflə çıxış etdiyi qeyd olunur.

Transfer bazarında böyük potensial kimi dəyərləndirilən Sidiki Şerif ətrafında proseslərin yaxın aylarda daha da sürətlənəcəyi istisna edilmir.