Avropa liderlərindən Ukraynaya güclü dəstək: yeni sülh prinsipləri razılaşdırıldı

Ukrayna Prezidenti Volodimir Zelenski, Böyük Britaniyanın Baş naziri Kir Starmer, Fransa Prezidenti Emmanuel Makron və Almaniya Kansleri Fridrix Merz Londonda keçirilən görüşdən sonra Ukraynaya dəstək barədə birgə bəyanat yayıblar.

“Operativ Məlumat Mərkəzi-OMM” xəbər verir ki, bu barədə Böyük Britaniya Baş nazirinin ofisinin açıqlamasına istinadən “Armenpress” məlumat yayıb.

Bəyanatda Avropa ölkələrinin Ukraynaya qeyd-şərtsiz və qətiyyətli dəstəyini bir daha təsdiqlədiyi bildirilib.

Qeyd olunub ki, Avropa Ukraynanın sabit və ardıcıl tərəfdarı kimi istənilən sülh nizamlanmasında mühüm rol oynayır və proses ABŞ və digər tərəfdaşlarla sıx koordinasiya şəraitində aparılmalıdır.

Liderlər görüşdə sülh prosesi ilə bağlı bir sıra prinsiplər üzrə razılığa gəliblər. Bunlara dərhal atəşkəs, hazırkı təmas xəttinin danışıqlar üçün əsas kimi qəbul edilməsi, Ukraynanın NATO da daxil olmaqla ittifaqlara qoşulmaq hüququnun tanınması və etibarlı təhlükəsizlik zəmanətləri daxildir.

Həmçinin vurğulanıb ki, Rusiyanın vurduğu zərərin kompensasiyası təmin olunana qədər dondurulmuş aktivlər saxlanılmalıdır və sülh müqaviləsi Avropanın təhlükəsizlik maraqlarını nəzərə almalıdır.

Bəyanatda qeyd edilib ki, Avropa liderləri Ukraynaya dəstəyin davam etdirilməsində qətiyyətlidir.