Martın 18-də Monteneqronun Petrovaç şəhərində qadın şahmatçılar arasında şəxsi Avropa çempionatına start veriləcək.

"Operativ Məlumat Mərkəzi-OMM" xəbər verir ki, 11 turdan ibarət qitə çempionatında 35 ölkə iştirak edəcək.

Azərbaycanı qitə çempionatında Günay Məmmədzadə, Ülviyyə Fətəliyeva, Gövhər Beydullayeva, Xanım Balacayeva, Gülnar Məmmədova, Türkan Məmmədyarova, Xəyalə Abdulla, Səbinə İbrahimova, Ayan Allahverdiyeva, Ləman Hacıyeva, Nərmin Abdinova, Mələk İsmayıl, Nazlı Hümbətova və Lalə Hüseynova təmsil edəcək.

Avropa çempionatının ümumi mükafat fondu 60 min avro təşkil edir.

Qitə çempionatına martın 29-da yekun vurulacaq.

Polşanın ev sahibliyi edəcəyi III Avropa Oyunları çərçivəsində şahmat yarışları keçiriləcək.

"Operativ Məlumat Mərkəzi-OMM" xəbər verir ki, Avropa Şahmat İttifaqının məlumatına əsasən şahmat turniri iyunun 19-da olacaq.

Azərbaycan Şahmat Federasiyası artıq komandanın heyəti ilə bağlı ərizəni təşkilatçılara göndərib. Polşadakı yarışda Azərbaycanı Şəhriyar Məmmədyarov və Günay Məmmədzadə təmsil edəcək.

Qeyd edək ki, qaydalara əsasən 2 nəfərdən ibarət (1 kişi və 1 qadın şahmatçı) iştirakçı komandalar blitsdə mübarizə aparacaq. İştirakçı ölkələr Beynəlxalq Şahmat Federasiyasının martın 1-də açıqlanan klassik şahmat üzrə reytinqinə əsasən seçilib. Reqlamentə görə komandalar dairəvi sistemlə mübarizə aparacaq. İlk dörd yeri tutacaq ölkələr pley-off mərhələsinə vəsiqə qazanacaq.

FIDE Azərbaycan millisinin üzvü, Avropa çempionatının gümüş mükafatçısı Günay Məmmədzadəni dünya yığmasına dəvət edib.

Azərbaycan Şahmat Federasiyasından "Operativ Məlumat Mərkəzi-OMM"-ə verilən məlumata görə, qrossmeyster Astana şəhərində Qazaxıstan yığmasına qarşı yoldaşlıq görüşü üçün dəvət alıb.

Qarşılaşma aprelin 7-dən mayın 1-dək Astanada keçiriləcək çinli Dinq Lirenlə rusiyalı Yan Nepomnyaşi arasında şahmat tacı uğrunda oyuna həsr olunacaq.

Məmmədzadə ilə yanaşı dünya komandasında Hou Yufan, Nana Dzaqnidze və digər tanınmış şahmatçılar çıxış edəcəklər.

Azərbaycanın stolüstü tennisçisi Adil Əhmədzadə Portuqaliyada keçirilən “WTT Youth Contender Vila Real 2023” turnirində uğurla çıxış edib.

"Operativ Məlumat Mərkəzi-OMM" xəbər verir ki, qrup mərhələsində Portuqaliya və İspaniya təmsilçilərini məğlub edən 14 yaşlı idmançı ardınca Polşa, Peru və Ruminiyadan olan rəqiblərinə də qalib gələrək yarımfinala yüksəlib.

Finalın bir addımlığında italiyalı rəqibinə uduzan Əhmədzadə bürünc medal qazanıb.

Qadın şahmatçılar arasında Azərbaycan çempionatının qalibi bəlli olub.

"Operativ Məlumat Mərkəzi - OMM"-nin məlumatına görə, titula Gövhər Beydullayeva sahib çıxıb. O, son turda ağ fiqurlarla Zeynəb Məmmədyarovanı məğlub etməklə birinci yeri təmin edib.

Bundan başqa, Nərmin Abdinova Xanım Balacayeva ilə heç-heçə oynayıb. Gülnar Məmmədova Ayan Allahverdiyevanı, Türkan Məmmədyarova Nurtən Nuriyevanı, Xəyallə Abdulla Ləman Hacıyevanı üstələyib.

Beləliklə 11 turda 7,5 xal toplayan Gövhər Beydullayeva ardıcıl ikinci dəfə Azərbaycan çempionatının qalibi olub. Aktivində 7 xal olan Xanım Balacayeva ikinci yeri tutub. Son turda istirahət edən Səbinə İbrahimova 6,5 xalla üçüncü pillədə qərarlaşıb.

Azərbaycan şahmatçısı Rauf Məmmədovun norveçli dünya çempionu Maqnus Karlsenin təşkil etdiyi Çempionlar Turunun "Airthings Masters" mərhələsində əldə etdiyi gəlir bəlli olub.

"Operativ Məlumat Mərkəzi- OMM"-in məlumatına görə, ümumi sıralamada 10-cu olan 35 yaşlı qrossmeyster 20 xal toplayıb.

Məmmədovun bu mərhələdən qazancı 7,500 ABŞ dolları təşkil edib.

Qeyd edək ki, "Airthings Masters"in qalibi olan Maqnus Karlsen 30 min dollar, ikinci və üçüncü yeri tutan ABŞ şahmatçılarından Hikaru Nakamura 20 min dollar, Uesli So isə 15 min dollara sahib çıxıb.