Dövlət Gömrük Komitəsinin Astara Gömrük İdarəsinin əməkdaşları tərəfindən keçirilən tədbirlər nəticəsində xüsusilə külli miqdarda narkotik vasitə aşkarlanaraq qanunsuz dövriyyədən çıxarılıb.
"Operativ Məlumat Mərkəzi-OMM" Komitəyə istinadən xəbər verir ki, narkotik vasitə “Cənub-Astara” gömrük postunda ölkə ərazisindən tranzit keçməklə İrandan Rusiyaya “təzə qarpız” yükü daşıyan nəqliyyat vasitəsində aşkar edilib.
Yük avtomobili stasionar rentgen qurğusunda yoxlanılarkən şübhəli cizgilər müşahidə olunub. Bundan sonra kinoloji xidmət itinin tətbiqi ilə nəqliyyat vasitəsinə əsaslı gömrük baxışı keçirilib.
Yoxlama zamanı avtomobilin qoşqusunda yerləşdirilən 92 ədəd paletdə, gömrük nəzarətindən gizlədilmiş vəziyyətdə, qablaşdırmaları ilə birlikdə ümumi çəkisi 61 kiloqram olan marixuana aşkarlanıb. Aşkar edilən narkotik vasitə xüsusilə külli miqdarda qiymətləndirilir.
Faktla bağlı araşdırma aparılır.
