Ermənistan Kollektiv Təhlükəsizlik Müqaviləsi Təşkilatına (KTMT) 2025-ci il üçün üzvlük haqqını ödəməyib.
“Operativ Məlumat Mərkəzi-OMM” xəbər verir ki, bu barədə Ermənistanın xarici işlər naziri Ararat Mirzoyan parlamentdə çıxışı zamanı məlumat verib.
Nazirin sözlərinə görə, ödənişin həyata keçirilməməsinin səbəbi Ermənistanın təşkilatda faktiki iştirak etməməsidir.
“Üzvlük haqqını sadəcə təşkilatda iştirak etməməyimizin sadə səbəbi ilə ödəmədik”, - deyə Mirzoyan bildirib.
Qeyd edək ki, Ermənistan 2024-cü il yanvarın 1-dən KTMT-dəki iştirakını dondurub və təşkilat çərçivəsində fəaliyyətini minimuma endirib.
Baş nazir Nikol Paşinyan daha əvvəl Ermənistanın KTMT-də iştirakını genişləndirməyi planlaşdırmadıqlarını bəyan edib.
Rusiya Prezidenti Vladimir Putin isə Ermənistanın KTMT ilə bağlı iradlarının həll edilməli olduğunu bildirib və bu məsələnin daxili siyasi mübahisələrə çevrilməməsinin vacibliyini vurğulayıb.
Paşinyan isə Ermənistanın 2022-ci il hadisələri fonunda KTMT-nin öhdəliklərinə reaksiya verməməsinə görə təşkilatdakı iştirakın faktiki dayandırıldığını qeyd edib.
