Almaniyanın "Frayburq" klubunun baş məşqçisi Kristian Ştrayx mövsümün sonunda istefa verəcək.
"Operativ Məlumat Mərkəzi-OMM" xəbər verir ki, mütəxəssis bu barədə klubun mətbuat xidmətinə açıqlamasında bildirib.
58 yaşlı çalışdırıcı cari mövsümün sonunda "Frayburq"u tərk edəcəyini deyib: “Bu barədə uzun müddət düşündüm və rəhbərliklə çoxlu söhbətlər etdim. Hesab edirəm ki, 29 ildən sonra yeni insanlara yer vermək üçün doğru zamandır. "Frayburq"da işlədiyim müddətdə yüzlərlə qeyri-adi təcrübə yaşadım. Bu klub mənim həyatımdır və burada aldığım böyük sevgi və dəstəyə görə minnətdaram".
Ştrayx 1995-ci ildən 2011-ci ilə qədər "Frayburq"un gənclər və U-19 komandalarında baş məşqçi olub. 2007-ci ildə əsas komandanın köməkçi məşqçisi olan çalışdırıcı 2012-ci ildən baş məşqçi postuna təyin edilib.
Almaniyalı mütəxəssis UEFA Avropa Liqasının 2022/2023 mövsümündə qrup mərhələsində "Qarabağ"la qarşılaşıb.
Qeyd edək ki, "Frayburq" Bundesliqanın son turunda "Bayer 04"ə 2:3 hesabı ilə məğlub olub. Komanda hazırda Almaniya çempionatında 33 xalla 9-cu yerdədir.