Alen Simonyan Sahibə Qafarova ilə görüşəcək: Rəsmi anons

Ermənistan parlamentinin spikeri Alen Simonyan azərbaycanlı həmkarı Sahibə Qafarova ilə İstanbulda baş tutacaq görüşünü anons edib.

“Operativ Məlumat Mərkəzi-OMM” Ermənistan mediasına istinadən xəbər verir ki, bu barədə parlamentin sədri jurnalistlərə açıqlamasında bildirib.

Onun sözlərinə görə, görüş aprelin 15-dən 19-dək keçiriləcək Parlamentlərarası İttifaqın 152-ci Assambleyası çərçivəsində baş tutacaq. "Bir neçə gündən sonra İstanbula yola düşəcəyəm. Azərbaycan (Sahibə Qafarova - red.) və Gürcüstan (Şalva Papuaşvili - red.) parlamentlərinin rəhbərləri ilə görüş planlaşdırılıb", - deyə Alen Simonyan qeyd edib.

Daha əvvəl məlumat verilmişdi ki, Ermənistan nümayəndə heyətinin tərkibinə həmçinin deputatlar Sarkis Xandanyan, Tsovinar Vardanyan və Asmik Akopyan daxil olacaq.