Kanadanın Alberta əyalətində müstəqillik tələbi ilə başladılan və 300 mindən çox imza toplanan vətəndaş təşəbbüsü ciddi hüquqi maneə ilə üzləşib.
“Operativ Məlumat Mərkəzi – OMM” xəbər verir ki, əyalət məhkəməsi yerli xalqların (“First Nations”) konstitusiya ilə tələb olunan məsləhətləşmə prosesinin aparılmadığını əsas gətirərək imza kampaniyasının dayandırılmasına qərar verib.
Buna baxmayaraq, Alberta Baş naziri Danielle Smith məhkəmə qərarından apellyasiya şikayəti verdiklərini bildirib. O, yüz minlərlə vətəndaşın iradəsinin gözardı edilə bilməyəcəyini vurğulayaraq səsvermənin keçirilməli olduğunu bəyan edib.
Eyni zamanda, keçmiş Baş nazir müavini Thomas Lukaszuk-un rəhbərlik etdiyi “Forever Canadian” qrupu Kanadanın tərkibində qalmağı dəstəkləyən 400 mindən çox imza toplayaraq öz mövqeyini ortaya qoyub.
Seçiciləri nə gözləyir?
Səsvermədə seçicilərə birbaşa “bəli” və ya “xeyr” sualı əvəzinə iki variant təqdim olunacaq:
1-ci seçim: Alberta Kanadanın bir əyaləti olaraq qalmağa davam etməlidir.
2-ci seçim: Alberta Hökuməti əyalətin Kanadadan ayrılması ilə bağlı hüquqi prosesi başlatmalıdır.
Qeyd olunur ki, bu səsvermə dərhal müstəqillik elan edilməsi demək deyil. Lakin ikinci variantın üstünlük təşkil etməsi ayrılma prosesinin hüquqi təməlinin qoyulması ilə nəticələnə bilər.
“Qərb yadlaşması” və iqtisadi narazılıq
Ayrılıq hərəkatının liderləri Mitch Sylvestre və vəkil Jeffrey Rath Ottavadakı federal hökumətin ekoloji siyasətinin əyalətin iqtisadiyyatına ciddi ziyan vurduğunu iddia edirlər.
İllərdir davam edən və “Qərb yadlaşması” adlandırılan narazılığın əsas səbəbləri arasında Albertanın istehsal etdiyi iqtisadi dəyərin qarşılığını ala bilməməsi və mərkəzi hakimiyyətin siyasətindən narazılıq göstərilir.
Məlumata görə, bəzi ayrılıqçı liderlərin müstəqil Alberta üçün maliyyə dəstəyi almaq məqsədilə ABŞ rəsmiləri ilə əlaqə saxladıqları barədə iddialar da gündəmdədir.
Hazırda tərəflər arasında mübarizə əsasən seçici fəallığının artırılmasına yönəlib. Çünki sorğular Kanada ilə birlikdə qalmağı dəstəkləyənlərin hələ də üstünlük təşkil etdiyini göstərir.
