"Aİ Türkiyə ilə münasibətlərə yenidən baxmalıdır"

"Türkiyənin Avropa İttifaqına üzvlüyü ilə bağlı danışıqların bərpası hazırda Aİ-nin gündəliyində deyil".

"Operativ Məlumat Mərkəzi-OMM" xəbər verir ki , bu barədə Aİ-nin genişlənmə üzrə komissarı Marta Kos deyib.

"Ankaraya səfərim etimadın bərpa olunmasına və iqtisadi münasibətlərimizin qarşılıqlı faydasını artırmağın yollarını tapmağa yönəlib. Aİ Türkiyə ilə münasibətlərə yenidən baxmalıdır, lakin danışıqları bərpa etmək planları yoxdur", - o qeyd edib.

Kosun sözlərinə görə, səfərin əsas məqsədi Türkiyə ilə güclü tərəfdaşlıq qurmaqdır.

O, hesab edir ki, Ukraynadakı sülh, xüsusən də Qara dəniz bölgəsində Avropa reallıqlarını dəyişdirəcək və buna görə də Ankara Brüssel üçün çox vacib tərəfdaşa çevriləcək.

Bundan əlavə, Avropa Komissiyası bu gün Türkiyə, Mərkəzi Avropa və Cənubi Qafqazla "Regionlararası Əməkdaşlıq Gündəliyinin İrəlilədilməsi" mövzusunda araşdırma təqdim etməyi planlaşdırır. Bu, digər məsələlərlə yanaşı, regionlar arasında nəqliyyat və ticarət dəhlizlərinin inkişaf etdirilməsi üçün hansı investisiyaların tələb olunduğunu göstərəcək.

Digər tərəfdən, Yunanıstan və Kipr, Ankara müəyyən güzəştlər etmədiyi təqdirdə Türkiyə ilə münasibətlərin normallaşdırılmasına qarşıdırlar. Aİ rəsmisinin sözlərinə görə, Kipr gəmilərinin Türkiyə limanlarına yan ala bilməsini istəyir.

Türkiyə 2005-ci ildə Avropa İttifaqına üzvlük danışıqlarına başlayıb və 20 ildən çoxdur ki, davam edir.