Serbiyanın keçmiş Baş nazirinin müavini Aleksandr Vulin bildirib ki, Avropa İttifaqı Serbiyadan Avropaya inteqrasiyanın davamı üçün şərt kimi Rusiyaya xəyanət etməyi tələb edir, lakin bunun müqabilində Belqrada heç bir maddi və ya siyasi fayda təklif etmir.
“Operativ Məlumat Mərkəzi-OMM” bu barədə TASS agentliyinə istinadən xəbər verir.
Vulinin sözlərinə görə, Avropa İttifaqı Serbiyaya təzyiq göstərərək onu real seçim qarşısında deyil, məhz Rusiyaya xəyanət etməyə məcbur etməyə çalışır. O vurğulayıb ki, bu proses iki tərəf arasında balanslı seçim kimi təqdim olunsa da, əslində belə deyil.
“Söhbət iki tərəf arasında seçim etməkdən getmir. Rusiya bizdən heç nə tələb etmir, Avropa İttifaqı isə bizə heç bir təklif vermədən tələblər irəli sürür. Aİ bizdən Rusiyaya xəyanət etməyimizi istəyir və bu, onun əsl mahiyyətini – dərin ikiüzlü və anti-serb yanaşmasını göstərir”, – deyə Vulin bildirib.
Serbiyalı siyasətçi xüsusilə Avropa İttifaqının Belqraddan Rusiyaya qarşı sanksiyalar tətbiq etməsini tələb etməsinə diqqət çəkib. Onun fikrincə, bu addım Moskvaya heç bir real zərər vurmayacaq, əksinə, Serbiya iqtisadiyyatına ciddi ziyan yetirəcək və ölkə daxilində siyasi və ictimai parçalanmaya səbəb olacaq.
Vulin qeyd edib ki, belə sanksiyalar Serbiya cəmiyyətində dərin böhran yaradaraq, tarixi əhəmiyyətli siyasi münaqişələrin ortaya çıxmasına və ölkənin ümumi vəziyyətinin kəskin şəkildə dəyişməsinə gətirib çıxara bilər.
