Avropa Xarici Fəaliyyət Xidməti (EEAS) İranda baş verən etirazlarla əlaqədar bu ölkənin Avropa İttifaqı yanındakı səfirini izaha çağırıb.
"Operativ Məlumat Mərkəzi-OMM" xəbər verir ki, bu barədə “Reuters” agentliyi Aİ nümayəndəsinə istinadən məlumat yayıb.
Məlumata görə, Avropa diplomatik xidməti çərşənbə axşamı İranın Aİ-dəki səfirini quruma dəvət edib.
Lakin EEAS-in mətbuat xidməti hələlik məsələ ilə bağlı rəsmi açıqlama verməyib.
Bununla yanaşı, İranın Almaniyadakı səfiri də Almaniya Xarici İşlər Nazirliyinə çağırılıb.
Nazirlik “X” sosial şəbəkəsində paylaşım edərək Tehranı etirazçılara qarşı hərəkətləri dərhal dayandırmağa çağırıb.
Qeyd edək ki, Avropa diplomatiyasının rəhbəri Kaya Kallas Almaniyaya səfəri zamanı keçirdiyi mətbuat konfransında bildirib ki, Avropa İttifaqı İranda kütləvi anti-hökumət etirazlarının iştirakçılarını fəal şəkildə dəstəkləyir. Bununla belə, o vurğulayıb ki, Aİ İran hökumətinin süqutunu gözləmir və dövlət quruluşunun dəyişdirilməsi ilə bağlı qərarın İran xalqına məxsus olduğunu qeyd edib.
