OMM Redaksiyası
“Sabah”ın 19 yaşadək futbolçulardan ibarət komandasının baş məşqçisi Adino Mustedanaqiç UEFA Gənclər Liqasının “Slaviya” ilə oyunundan sonra komandasının çıxışını şərh edib. Bakıda keçirilən görüşdə paytaxt təmsilçisi 0:3 hesabı ilə məğlub olub.
Xorvatiyalı mütəxəssis komandanın oyuna həyəcanlı başladığını, ilk hissədə planlarına sadiq qalmadığını və topu tez-tez itirdiyini deyib. Onun sözlərinə görə, “Sabah” sadə səhvlərdən qollar buraxıb.
“Sabah” hücumda inkişaf etməlidir
Mustedanaqiç bildirib ki, “Slaviya”nın azlıqda qalmasından sonra komandası oyun sistemini dəyişərək rəqibin cərimə meydançasında daha çox futbolçu ilə yer almağa çalışıb. “Sabah” ikinci hissədə qol imkanları yaratsa da, üç əlverişli fürsətdən yararlana bilməyib. Rəqib isə oyunun son dəqiqələrində səhvdən istifadə edərək üçüncü qolunu vurub.
Baş məşqçi qarşıdakı oyunlarda hesabı açmağın və rəqib qapısı qarşısında daha təhlükəli olmağın vacibliyini vurğulayıb. “Meydanda daha cəsarətli davranmalıyıq”, – deyə o bildirib. Komanda hazırlıq prosesində topa sahib olarkən daha yaxşı oynamaq və hücumda təhlükəliliyi artırmaq üzərində çalışacaq.
“Sabah” UEFA Gənclər Liqasının ilk oyununda “Mançester Yunayted”ə 0:5 hesabı ilə uduzub. Mustedanaqiç “Slaviya” ilə matçda komandasının daha irəlidə oynamağa və topa nəzarət etməyə çalışdığını, bunun inkişaf göstəricisi olduğunu qeyd edib.
