OMM Redaksiyası
Ötən il mədəniyyət sahəsində kadr potensialının gücləndirilməsi istiqamətində əhəmiyyətli işlər görülüb. Ən vacib sahələrdən biri olan mədəniyyətin inkişafı məqsədilə çoxsaylı qərarlar qəbul edilib, müxtəlif tədbirlər həyata keçirilib və sektor daha da gücləndirilib.
"Operativ Məlumat Mərkəzi-OMM" xəbər verir ki, bu fikirləri mədəniyyət naziri Adil Kərimli fevralın 11-də nazirliyin 2025-ci ildəki fəaliyyətinə həsr olunmuş kollegiya iclasında səsləndirib.
Nazir bildirib ki, bu il qəbul edilmiş "Azərbaycan Mədəniyyəti - 2040" Konsepsiyası mühüm sənəddir. Konsepsiya qarşıdakı dövrdə həyata keçiriləcək islahatların istiqamətini müəyyənləşdirəcək, yol xəritəsini formalaşdıracaq və görüləcək işlərin zəruriliyini əsaslandıracaq.
Onun sözlərinə görə, mədəniyyət anlayışının müxtəlif mənaları var və cəmiyyətdə bu sahəyə düzgün baxışın formalaşdırılması xüsusi əhəmiyyət daşıyır.
