OMM Redaksiyası
ABŞ və Çin süni intellekt sahəsindəki fikir ayrılıqlarına baxmayaraq, texnologiyanın risklərini idarə etmək üçün əməkdaşlıq etməlidir. ABŞ-ın maliyyə naziri Skott Bessent bu barədə çərşənbə axşamı Nyu-Yorkda ABŞ-Çin Münasibətləri üzrə Milli Komitədə çıxışı zamanı deyib. AnewZ-nin məlumatına görə, Bessent Vaşinqtonun Pekinlə “tarazlıq və qarşılıqlılıq əsasında konstruktiv münasibətlər qurmaq” istədiyini bildirib.
Bessent gələn həftə Çinə səfər edəcək. ABŞ Prezidenti Donald Tramp və Çin lideri Si Cinpin bu il üçüncü dəfə görüşəcəklər. Danışıqların noyabrın 18-19-da Şençjendə, Asiya-Sakit Okean İqtisadi Əməkdaşlıq Təşkilatının (APEC) liderlər sammiti çərçivəsində keçirilməsi planlaşdırılır.
Bessentin sözlərinə görə, görüşdə Tramp administrasiyasının qabaqcıl süni intellekt üçün üstünlük verdiyi “superintellekt” anlayışı üzrə yeni ikitərəfli dialoqa start veriləcək. Məqsəd ortaq risklərin qarşısını almaq və “iki sistemimiz arasında anlaşılmazlığın yaranmasına yol verməməkdir”.
“Həmçinin qabaqcıl modellərin yayımlanmasından əvvəl onların qiymətləndirilməsi və sınaqdan keçirilməsi, eləcə də bu texnologiyanın idarə olunmasında insan mühakiməsinin əsas rolunu qorumaq üzrə ən yaxşı təcrübələri bölüşəcəyik”, – Bessent deyib.
O əlavə edib ki, tərəflər ciddi süni intellekt insidentləri barədə bir-birini xəbərdar etmək üçün birbaşa əlaqə kanalı yaratmağa razılaşıblar. Tramp və Si sentyabrda Ağ Evdə görüşərkən xəbərdarlıq sistemi barədə razılığa gəliblər. Həmin vaxt Tramp ABŞ-ın bu sahədə liderliyini qorumaq istədiyi üçün yeni məhdudiyyətlərə əlavə etməyə tərəddüd etdiyini demişdi.
“Bununla yanaşı, ABŞ və Çin arasındakı fərqlərlə bağlı heç bir illüziyaya qapılmamalıyıq. Maraqlarımız həmişə üst-üstə düşməyəcək”, – Bessent bildirib.
Bessent “Nvidia” şirkətinin baş icraçı direktoru Censen Huana dair mübahisəyə toxunmayıb. “New York Times”ın məlumatına görə, ABŞ təhlükəsizlik xidmətlərinin Çin kəşfiyyatının əməkdaşı olduğundan şübhələndiyi iş qadını ilə münasibətdə olduğu iddiasından sonra şirkətin direktorlar şurası Huanla bağlı araşdırma aparır.
Çin Xarici İşlər Nazirliyi casusluq iddialarını “əsassız” və “böhtan” adlandırıb. “Nvidia” isə direktorlar şurasının milli təhlükəsizliyin və ya şirkət sirlərinin zərər gördüyünə inanmaq üçün əsasının olmadığını bildirib.
Huan mayda Pekində və sentyabrda Vaşinqtonda keçirilən Tramp-Si görüşlərində iştirak edib. Onun Trampı Şençjenə səfərdə müşayiət edib-etməyəcəyi bəlli deyil.
Bessent iki əvvəlki sammitdə razılaşdırılan ticarət tədbirlərindən də danışıb. Bunlara hər iki istiqamətdə 30 milyard dollar dəyərində qeyri-həssas mallara qarşılıqlı tarif endirimlərini müəyyənləşdirəcək “Ticarət Şurası” və Çinin ABŞ-dan kənd təsərrüfatı məhsulları almaq öhdəliyi daxildir.
Bessentin sözlərinə görə, “İnvestisiya Şurası” adlı oxşar mexanizm ABŞ şirkətlərinin Çində bazara çıxışı kimi məsələlərlə məşğul olacaq.
O, ABŞ-ın Çinlə ticarət kəsirinin hələ də fikir ayrılığına səbəb olduğunu etiraf edib. Bununla belə, Vaşinqtonun məqsədinin Pekinlə ticarətdən ayrılmaq deyil, riskləri azaltmaq olduğunu vurğulayıb.
Tramp və Si arasında dördüncü görüşün dekabrda ABŞ-ın Mayamidə ev sahibliyi edəcəyi G20 sammitində keçirilməsi gözlənilir.
