OMM Redaksiyası
ABŞ Silahlı Qüvvələri Sakit okeanın şərqində narkotik vasitələrin qanunsuz dövriyyəsində şübhəli bilinən gəmiyə hərbi zərbə endirib.
“Operativ Məlumat Mərkəzi-OMM” "U.S. Southern Command"-a (SOUTHCOM) istinadən xəbər verir ki, əməliyyat fevralın 20-də general Frensis Donovanın göstərişi ilə "Joint Task Force Southern Spear" xüsusi bölməsi tərəfindən həyata keçirilib.
Komandanlığın "X" sosial şəbəkə hesabında paylaşdığı rəsmi bəyanatda qeyd olunub ki, kəşfiyyat məlumatları gəminin məlum narkotrafik marşrutları ilə hərəkət etdiyini təsdiqləyib.
Əməliyyat nəticəsində üç nəfər öldürülüb. ABŞ hərbçiləri arasında xəsarət alan olmayıb.
ABŞ Prezidenti Donald Tramp bu cür zərbələri Latın Amerikası kartelləri ilə davam edən silahlı münaqişənin tərkib hissəsi və narkotik axınının qarşısını almaq üçün zəruri tədbir kimi qiymətləndirib.
Lakin rəsmi Vaşinqton öldürülən şəxslərin məhz terrorçu qruplaşmalarla əlaqəli olduğuna dair hələlik geniş sübutlar təqdim etməyib.
