Ağ Ev Kanadanın Ontario əyalətinə ABŞ-ə elektrik enerjisinin verilməsini tamamilə kəsmək planlarının ciddi nəticələrə səbəb ola biləcəyi ilə bağlı xəbərdarlıq edib.
"Operativ Məlumat Mərkəzi-OMM" xəbər verir ki, bununla bağlı xarici KİV məlumat yayıb.
Bildirilib ki, Ağ Evin sözçüsü Karolin Leavitt mətbuat konfransında Ontarionun Baş naziri Daq Fordun ABŞ ştatlarına elektrik enerjisi verilməsi planları ilə bağlı açıqlamalar verib.
"Kanada Birləşmiş Ştatlara və vətəndaşlarımıza elektrik enerjisini kəsməyi düşünsə, ciddi nəticələrlə üzləşəcək", - o qeyd edib.
Prezident Donald Trampın ABŞ-nin xarici ölkələrin, o cümlədən Kanadanın elektrik enerjisindən asılı olmamasında qərarlı olduğunu ifadə edən Leavitt, Kanadanın ağıllı bir qərar verəcəyinə ümid etdiklərini söyləyib.
Leavitt qonşu və tərəfdaş kimi təsvir etdiyi Kanadanın artıq rəqib ola biləcəyini də bildirib.
